சுயேட்சைகள் வெற்றி பெற்றால் என்ன நடக்கும்? நடிகர் மயில்சாமி பேட்டி
- IndiaGlitz, [Wednesday,March 17 2021]
சுயேச்சைகள் வெற்றி பெற்றால் என்ன நடக்கும் என விருகம்பாக்கம் தொகுதியில் சுயேட்சையாக போட்டியிடும் நடிகர் மயில்சாமி பேட்டி ஒன்றில் கூறியிருப்பது பெரும் பரபரப்பை ஏற்படுத்தி உள்ளது.
ஒரு தொகுதியில் சுயேச்சை ஒருவர் வெற்றி பெற்றால் அந்த தொகுதியில் சுயேச்சைக்கு ஓட்டு போட்ட அனைவருமே ஆளுங்கட்சி, எதிர்க்கட்சி ஆகிய இரண்டு தரப்புக்கும் எதிரானவர்கள் என்று அர்த்தம். அந்த வகையில் நான் என்னுடைய தொகுதியில் ஆளும் கட்சிக்கும் எதிர்க் கட்சிக்கு எதிரானவர்கள் எத்தனை பேர் இருக்கிறார்கள் என்பதை கணக்கிடவே போட்டியிடுகிறேன்.
நான் வெற்றிபெற 75 ஆயிரம் வாக்குகள் தேவை என்றால் அந்த 75 ஆயிரம் வாக்குகளை நான் பெற்று ஒருவேளை நான் வெற்றி பெற்று விட்டால், அந்த 75 ஆயிரம் பேர்களும், ஆளும் கட்சிக்கும் எதிர்க் கட்சிக்கும் எதிராக இருக்கிறார்கள் என்று தானே அர்த்தம். இதேபோல் ஒவ்வொரு தொகுதியிலும் சுயேட்சைகள் போட்டியிட்டு வெற்றி பெற்றால் தான் தமிழகத்தில் எத்தனை பேர் இந்த இரு கட்சிகளிடம் அதிருப்தியாளர்களாக இருப்பார்கள் என்று தெரியவரும் என்று கூறினார்.
மேலும் அனைத்து கட்சியில் உள்ளவர்களும் சுயநலம் உள்ளவர்கள் தான் இருக்கிறார்கள் என்றும் இதுவரை எந்த கட்சியினராவது எனக்கு சீட் வேண்டாம் அவருக்கு கொடுங்கள் என்று பரிந்துரை செய்தது உண்டா? என்றும், சீட்டு கிடைக்கவில்லை என்றால் கட்சி தாவும் நபர்கள்தான் அதிகமாக இருக்கிறார்கள் என்றும், இதையெல்லாம் பார்த்து மனம் நொந்து போய் தான் தேர்தலில் போட்டியிடுகிறேன் என்றும் மயில்சாமி தெரிவித்தார்.
மேலும் எனக்கு அனைத்து கட்சி தொண்டர்களும் ஓட்டு போடுவார்கள் என்றும் அந்த அளவிற்கு என்னுடைய தொகுதியில் நான் மக்களிடம் பழகி இருக்கிறேன் என்றும், மக்களும் என்னுடன் பழகி இருக்கிறார்கள் என்றும் மயில்சாமி தெரிவித்தார்.