தளபதி விஜய் நடித்து வரும் 'விஜய் 62' திரைப்படத்தின் படப்பிடிப்பை இயக்குனர் ஏ.ஆர்.முருகதாஸ் விறுவிறுப்புடன் நடத்தி வருகிறார். தற்போது சென்னையில் உள்ள தனியார் ஸ்டுடியோ ஒன்றில் அரசியல் கூட்டம் சம்பந்தப்பட்ட காட்சிகளின் படப்பிடிப்புகள் நடந்து வருகிறது.

இந்த நிலையில் இந்த படத்தில் நடிகர் பிரேம் நடித்து வருவது தெரியவந்துள்ளது. 'விக்ரம் வேதா' படத்தில் போலீஸ் கேரக்டரில் கம்பீரமாக நடித்த இவர் தற்போது 'விஜய் 62' படத்திலும் ஒரு முக்கியத்துவமான கேரக்டரில் நடித்து வருகிறார். இதுகுறித்து பிரேம் கூறியபோது, 'ஏற்கனவே விஜய்யுடன் இணைந்து ஒருசில நாட்கள் படப்பிடிப்பில் கலந்து கொண்டுள்ளேன். மீண்டும் இம்மாத இறுதியில் படக்குழுவினர்களுடன் இணையவுள்ளேன். இந்த படத்தில் எனக்கு முக்கியவத்துவம் வாய்ந்த கேரக்டரை இயக்குனர் முருகதாஸ் அவர்கள் கொடுத்துள்ளார். என்னுடைய பெரும்பாலான காட்சிகள் விஜய்யுடன் இணைந்து வரும் காட்சிகளாக இருக்கும்' என்று கூறினார்.

'விஜய் 62' படம் போக, பிரேம் தற்போது 'எழுமின்' மற்றும் 'செயலி' ஆகிய படங்களிலும் நடித்து வருகிறார். இவர் ஏற்கனவே 'கொடி வீரன், 'சிங்கம் 3', '36 வயதினிலே', 'பிரியாணி', 'சாட்டை' உள்பட சுமார் ஐம்பது படங்களில் நடித்துள்ளார் என்பது குறிப்பிடத்தக்கது.