பிரபல இயக்குனர் பா ரஞ்சித் இயக்கத்தில் சமீபத்தில் வெளியான ’சார்பாட்டா பரம்பரை’ திரைப்படம் மிகப் பெரிய வெற்றி பெற்றது என்பது தெரிந்ததே. இந்த படத்தின் வெற்றியை இன்னும் திரையுலகினரும் படக்குழுவினருடன் கொண்டாடி வருகின்றனர்.

இந்த நிலையில் ’சார்பாட்டா பரம்பரை’ வெற்றியை அடுத்து ’நட்சத்திரம் நகர்கிறது’ என்ற படத்தை பா ரஞ்சித் தற்போது இயக்கி வருகிறார். காளிதாஸ் ஜெயராம், துஷாரா உள்பட பலர் நடித்து வரும் இந்த படத்தின் படப்பிடிப்பை அவர் இரண்டே மாதங்களில் முடிக்க திட்டமிட்டுள்ளார் என்று கூறப்படுகிறது.

இந்த நிலையில் கடந்த சில ஆண்டுகளுக்கு முன்பே சியான் விக்ரமிடம் பா ரஞ்சித் ஒரு கதை கூறியதாகவும் அந்த கதையை தற்போது படமாக்கலாம் என விக்ரம் தரப்பில் இருந்து கிரீன் சிக்னல் வந்துள்ளதாகவும் தகவல் வெளிவந்துள்ளது. இதனை அடுத்து ’நட்சத்திர நகர்கிறது’ படத்தின் படப்பிடிப்பை முடித்துவிட்டு பா ரஞ்சித் விக்ரம் படத்தை இயக்குவார் என்றும் அதற்குள் விக்ரம் ’சியான் 60’ மற்றும் ‘கோப்ரா’ படங்களின் படப்பிடிப்பை முடித்துவிட்டு பா ரஞ்சித் படத்திற்கு தயாராகி விடுவார் என்றும் கூறப்படுகிறது.

மேலும் இந்த திரைப்படத்தை ஸ்டூடியோ கிரீன் நிறுவனத்தின் ஞானவேல்ராஜா தயாரிக்கவுள்ளார் என்று கூறப்படுகிறது. இவர் ஏற்கனவே பா ரஞ்சித் இயக்கிய ’மெட்ராஸ்’ படத்தை தயாரித்துள்ள நிலையில் தற்போது மீண்டும் அவருடன் இணைகிறார் என்பது குறிப்பிடத்தக்கது.