விக்ரமை மீண்டும் பாட வைப்பாரா தேவிஸ்ரீ பிரசாத்
- IndiaGlitz, [Friday,May 25 2018]
சீயான் விக்ரம் ஒரு சிறந்த நடிகர் மட்டுமின்றி டப்பிங் கலைஞர் மற்றும் பாடகர் என்பது பலர் அறிந்ததே. குறிப்பாக 'கந்தசாமி' படத்தில் அவர் பாடிய நான்கு பாடல்களும் சூப்பர் ஹிட் ஆனது. மேலும் ஜெமினி, மதராசபட்டனம், தெய்வத்திருமகள், ராஜபாட்டை, ஸ்கெட்ச் உள்பட ஒருசில படங்களில் விக்ரம் பாடியுளார் என்பது குறிப்பிடத்தக்கது.
இந்த நிலையில் ஹரி இயக்கத்தில் விக்ரம் நடிப்பில் உருவாகி வரும் 'சாமி 2' படத்திலும் விக்ரமை பாட வைக்க இந்த படத்தின் இசையமைப்பாளர் தேவிஸ்ரீ பிரசாத் முயற்சிப்பதாக பேட்டி ஒன்றில் கூறியுள்ளார்.
''விக்ரம் ஒரு நல்ல பாடகர், அவரது குரல் எனக்கு ரொம்ப பிடிக்கும். 'கந்தசாமி' படத்தில் அவரை பாட வைத்தபோது அவருக்குள் இருந்த திறமையான பாடகரை அறிந்தேன். ஆனால் 'சாமி 2' படத்தில் விக்ரம் பாடல் பாடுவாரா? என்பதை இயக்குனர் ஹரி தான் முடிவு செய்ய வேண்டும். அவர் அனுமதி அளித்தால் மீண்டும் விக்ரமை பாட வைப்பேன்' என்று கூறியுள்ளார். மேலும் இயக்குனர் ஹரி மெலடி பாடலை விரும்புபவர். அவர் விரும்பும் இசையை 'சாமி 2' படத்தில் அளிப்பேன்' என்று கூறியுள்ளார்.
விக்ரம், கீர்த்திசுரேஷ், பிரபு, பாபிசிம்ஹா, சூரி, ஜான்விஜய் உள்பட பலர் நடித்து வரும் 'சாமி 2' திரைப்படத்தை தமீன்ஸ் பிலிம்ஸ் தயாரித்து வருகிறது. இந்த படத்தின் படப்பிடிப்பு விறுவிறுப்பாக நடைபெற்று வருகிறது