వైవిధ్య‌భరితమైన కథాంశాలతో పోలీస్ చిత్రాలను తెరకెక్కించడంలో ద‌ర్శ‌కుడు గౌతమ్ మీనన్ సిద్ధ హస్తుడు. క‌థ ఏదైనా.. పాత్రలో పరకాయ ప్రవేశం చేసి విల‌క్ష‌ణ న‌ట‌న‌తో మెప్పించడంలో చియాన్ విక్రమ్ పెట్టింది పేరు. అలాంటి వీరిద్దరి తొలి కాంబినేషన్‌లో 'ధ్రువ‌ నచ్చత్తిరమ్' పేరుతో ఓ క్రేజీ ప్రాజెక్ట్‌ రూపొందుతున్న సంగ‌తి తెలిసిందే. ఈ సినిమా గత ఏడాది కాలంగా ఏడు దేశాల్లో చిత్రీకరణ జరుపుకుంది.

తాజా సమాచారం ప్రకారం.. ఈ మూవీ ట్రైలర్‌ని త్వరలోనే విడుదల చేసేందుకు చిత్ర యూనిట్‌ సన్నాహాలు చేస్తున్నట్లు తెలుస్తుంది. ఇదిలా ఉంటే...ఈ నెల 25వ తేదీ నుంచి నెల రోజుల పాటు ఈ చిత్రం చివరి షెడ్యూల్ జరుపుకోనుందని సమాచారం.

ఈ చిత్రంలో విక్రమ్ సరసన పెళ్ళి చూపులు ఫేమ్ రీతూ వర్మ కథానాయికగా నటిస్తుండ‌గా.. ఐశ్వర్య రాజేష్, పార్తిబన్, సిమ్రాన్, రాధిక శరత్ కుమార్ ముఖ్య పాత్రలు పోషిస్తున్నారు. హారిస్ జయరాజ్ సంగీతాన్ని అందిస్తున్న‌ ఈ చిత్రం విడుదల కోసం అభిమానులు ఆసక్తిగా ఎదురుచూస్తున్నారు. ఈ ఏడాది ద్వితీయార్థంలో ఈ సినిమా తెర‌పైకి వ‌చ్చే అవ‌కాశ‌ముంది.