கமல்ஹாசன் நடிப்பில் இயக்குனர் ஷங்கர் இயக்கத்தில் உருவாகவுள்ள 'இந்தியன் 2' திரைப்படம் விரைவில் தொடங்கவுள்ள நிலையில் கமல்ஹாசனின் 'ராஜ்கமல் பிலிம்ஸ்' நிறுவனம் தயாரிப்பில் சீயான் விக்ரம் நடித்து வரும் 'கடாரம் கொண்டான்' திரைப்படத்தின் படப்பிடிப்பு இறுதிக்கட்டத்தில் உள்ளது. சென்னையில் உள்ள பிரமாண்டமான செட் ஒன்றில் நடைபெற்று வரும் இந்த படத்தின் படப்பிடிப்பு அனேகமாக வரும் ஜனவரிக்குள் முடிந்துவிடும் என்றும் எதிர்பார்க்கப்படுகிறது.

விக்ரம் ஜோடியாக கமலின் மகள் அக்சராஹாசன் நடித்து வரும் இந்த படத்தை 'தூங்காவனம்' இயக்குனர் ராஜேஷ் எம்.செல்வா இயக்கி வருகிறார். மேலும் இந்த படத்தில் நாசர் மகன் அபி மெஹ்தி ஹாசன், '8 தோட்டாக்கள்' பட நாயகி மீராமிதுன் ஆகியோர்களும் முக்கிய வேடத்தில் நடித்து வருகின்றனர்.

நடிகர் விக்ரமின் 56ஆவது படமாக உருவாகி வரும் இந்த படம் வரும் கோடை விடுமுறையில் வெளியாகும் என்று எதிர்பார்க்கப்படுகிறது.