టాలీవుడ్‌లో సెకండ్ ఇన్నింగ్స్‌‌తో బిజీ అయిన నటీనటీమణులెవరైనా ఉన్నారంటే ఒకరిద్దరు తప్ప.. దాదాపు లేరనే చెప్పుకోవాలి. ఎందుకంటే.. రీ ఎంట్రీ ఇచ్చినప్పటికీ సరైన పాత్రలు దొరక్క.. వచ్చిన పాత్రల్లో నటించడానికి మనసొప్పక చాలా మంది బ్యాక్ టూ హోమ్ అంటూ వెళ్లిపోతున్నారు. అయితే విజయశాంతి.. అలియాస్ రాములమ్మ మాత్రం రీ ఎంట్రీతోనే నక్క తోక తొక్కిందేమో గానీ వరుసగా అవశాలు వచ్చేస్తున్నాయి. ఒక్క మాటలో చెప్పాలంటే రాములమ్మ.. ‘సరిలేరు నాకెవ్వరూ.. నాకు నేనే సాటి’ అన్నట్లుగా దూసుకెళ్తోందని చెప్పుకోవచ్చు.

‘సరిలేరు నీకెవ్వరు’తో రాములమ్మ రీ-ఎంట్రీ!
ఒకట్రెండు కాదు ఏకంగా 13 ఏళ్ల గ్యాప్ తర్వాత విజయశాంతి అలియాస్ రాములమ్మ రంగంలోకి దిగారు. సూపర్ స్టార్ మహేష్ బాబు, రష్మిక మందన్నా నటీనటులుగా వరుస విజయాల దర్శకుడు అనిల్ రావిపూడి తెరకెక్కిస్తున్న చిత్రం ‘సరిలేరు నీకెవ్వరు’ సినిమాతో ఈ సీనియర్ నటి రీ ఎంట్రీ ఇచ్చింది. ఇప్పటికే ఈ సినిమా హీరో, హీరోయిన్‌తో పాటు కీలక పాత్రధారి అయిన విజయశాంతిపై కూడా దాదాపు అన్ని సన్నివేశాలను చిత్రీకరించడం జరిగింది. వచ్చే ఏడాది సంక్రాంతికి ఈ సినిమాను థియేటర్లలోకి తీసుకురావాలని దర్శకనిర్మాతలు ఫిక్స్ అయ్యారు.

చిరు సినిమాలో..!
అయితే.. ఈ సినిమాలో కీలకపాత్ర పోషించిన రాములమ్మకు.. షూట్‌లో ఉండగానే ‘మేడం.. మేడం ప్లీజ్ మా సినిమాలో చేయండి’ అని ఒకరిద్దరూ టాప్ డైరెక్టర్స్ సంప్రదించారట. అంతేకాదు.. మెగాస్టార్ చిరంజీవి-కొరటాల శివ కాంబోలో వస్తున్న సినిమాలో సైతం నటించాలని కోరారట. మెగాస్టార్-రాములమ్మ పాత కాంబో కావడంతో మారుమాట చెప్పుకుండానే గ్రీన్ సిగ్నల్ ఇచ్చేసిందట. ఈ సినిమాలో మాత్రం కీలక పాత్రే అని.. రాములమ్మ కోసం ప్రత్యేకంగా కొరటాల స్క్రిప్ట్ రాశారని టాక్ నడుస్తోంది.

సీక్వెల్ సినిమాలోనూ..!
ఇదిలా ఉంటే.. ‘సరిలేరు నీకెవ్వరు’ సినిమా షూటింగ్‌లో విజయశాంతి యాక్టింగ్‌కు ఫిదా అయిన అనిల్ రావిపూడి ‘ఎఫ్ 2’ చిత్రానికి సీక్వెల్ ‘F3’ లో విజయశాంతికి కీలక పాత్ర ఇవ్వాలని ఫిక్స్ అయ్యారట. ఇప్పటికే ఈ విషయాన్ని విజయశాంతి దృష్టికి ఆయన తీసుకెళ్లగా ‘నేను రెఢీ.. అనిల్’ అని చెప్పేసిందట. అంటే ప్రస్తుతానికి రాములమ్మ రీ ఎంట్రీతోనే సూపర్‌స్టార్‌తో పూర్తవ్వగా.. వరుసగా మరో రెండు సినిమాలు రెడీగా ఉన్నాయన్న మాట.

మొత్తానికి చూస్తే.. రాజకీయాల్లో రాణించలేకపోయిన రాములమ్మ సరైన టైమ్‌లోనే రీ ఎంట్రీ ఇవ్వడంతో అవకాశాలు వాటంతట అవే వచ్చి వాలిపోతున్నాయ్. మరోవైపు తనలో ఉన్న పాత నటనను ప్రూవ్ చేయడానికి ఇంతకంటే మరో అవకాశం రాదేమో. పొలిటిషియన్‌గా అట్టర్ ప్లాప్ అయిన విజయశాంతి.. సినిమాల్లో సూపర్ హిట్టయ్యి ‘లేడీ సూపర్ స్టార్‌’గా ఓ వెలుగు వెలగాలని www.indiaglitz.com ఆకాంక్షిస్తోంది.