టీడీపీ అధినేత, ప్రతిపక్షనేత చంద్రబాబు.. సొంత పార్టీని గొంతు పిసికి చంపేస్తున్నారని వైసీపీ ఎంపీ విజయసాయిరెడ్డి సంచలన వ్యాఖ్యలు చేశారు. విశాఖలో జరిగిన వైసీపీ సభలో ఆయన ప్రసంగిస్తూ.. చంద్రబాబు, నారా లోకేష్‌పై వివాదాస్పద వ్యాఖ్యలు చేశారు. ‘సీఎంగా వైఎస్ జగన్ మోహన్ రెడ్డి అద్భుతంగా పాలన అందిస్తుంటే.. ఓ ముసలి నక్క, ఆయన కొడుకు యువనక్కకు కడుపు మంటగా ఉంది. ఆ ముసలి నక్క, యువ నక్క ఎవరో మీకు తెలుసు. 2014 నుంచి 2019 వరకు ఆ ముసలి నక్క సీఎంగా పనిచేసింది. ఐదేళ్లలో ఆ ముసలి నక్క సాధించలేదని.. ఈ ప్రభుత్వం ఐదు నెలల్లో సాధిస్తోందని కడుపు మంట. రాబోయే ఎన్నికల్లో ఆ ముసలి నక్క పోటీ చేసే పరిస్థితి లేదు. ఆ యువనక్క సమర్థత మీద ప్రజల్లో నమ్మకం లేదు. టీడీపీని చంద్రబాబు గొంతుపిసికి చంపేస్తున్నారు. మామకు వెన్నుపోటు పొడిచిన చంద్రబాబు... ఇప్పుడు పార్టీని గొంతు పిసికి చంపేస్తున్నారు. ఎన్టీఆర్ పెట్టిన పార్టీని బీజేపీలో కలిపేస్తున్నారు. మరో ఇంట్లో బతకడానికి బాబు రెడీ అయ్యారు. అందుకు టీడీపీని పణంగా పెట్టారు. ఒకప్పుడు జాతీయ నాయకుడిగా ఉన్నచంద్రబాబునాయుడు ఇప్పడు ఒక ‘జాతి’ నాయకుడిగా మారిపోయారు’ అని విజయసాయి తీవ్ర స్థాయిలో విమర్శలు గుప్పించారు.

బాబే బీజేపీలోకి పంపారు!

టీడీపీకి టాటా చెప్పి బీజేపీ తీర్థం పుచ్చుకున్న రాజ్యసభ ఎంపీల గురించి మాట్లాడిన ఆయన.. సుజనా చౌదరి, సీఎం రమేష్, టీజీ వెంకటేష్, గరికపాటిలను చంద్రబాబే బీజేపీలోకి పంపారన్నారు. సుజనాచౌదరి నుంచి వల్లభనేని వంశీ వరకు పరిశీలిస్తే.. టీడీపీ భవిష్యత్ ఏంటో అర్థం అవుతుందన్నారు. చంద్రబాబు అసలు పుత్రుడు లోకేష్ మంగళగిరిలో ఒక్కచోట ఓడిపోతే, దత్తపుత్రుడు పవన్ కళ్యాణ్ రెండు చోట్లా ఓడిపోయారని ఎద్దేవా చేశారు. జగన్ ప్రయోగించిన రామబాణానికి చంద్రబాబు ఐదు నెలల క్రితమే నేల కూలారని విజయసాయిరెడ్డి చెప్పుకొచ్చారు.

ఏ రాష్ట్రంలోనూ ఇన్ని అమలు కావట్లేదు!

‘పదేళ్ల పోరాటం తర్వాత వైసీపీ అధికారంలోకి వచ్చింది. ఐదు నెలల పాలనలోనే ముఖ్యమంత్రి వైయస్‌ జగన్‌మోహన్‌రెడ్డి 80 శాతం హామీలన్నీ నెరవేర్చారు. తొలి అసెంబ్లీలోనే అన్ని వర్గాలకు మేలు చేసే 20 బిల్లులు ప్రవేశపెట్టడం జరిగింది. ఎస్సీ, ఎస్టీ, బీసీ, మైనార్టీలకు 50 శాతం రిజర్వేషన్‌ ఇచ్చిన ఘనత సీఎం వైయస్‌ జగన్‌కే దక్కింది. ఏ రాష్ట్రంలోనూ ఇన్ని సంక్షేమ పథకాలు అమలు కావడం లేదు. కృష్ణా, గోదావరి నదీ జలాల వినియోగంపై పక్క రాష్ట్రాలతో సఖ్యతగా ఉంటూ పరిష్కార మార్గాలకు ప్రత్యేక ప్రణాళికతో ముందుకు వెళ్తున్నాం. మహిళల సంక్షేమ కోసం సంపూర్ణ మద్యపాన నిషేధం దిశగా ప్రభుత్వం అడుగులు వేస్తుంది. కులాలు, మతాలు, ప్రాంతాలు, పార్టీలకు అతీతంగా సంక్షేమ పథకాలు అందిస్తున్నాం. వచ్చే ఐదేళ్ల పాలనలో పేదలకు 25 లక్షల ఇళ్లు ఇస్తాం. అన్ని వర్గాలకు మేలు చేస్తున్న వైసీపీ ప్రభుత్వాన్ని ప్రజలు ఆశీర్వదించాలి’ అని ఈ సందర్భంగా విజయసాయి కోరారు.