தமிழ் திரையுலகின் முன்னணி காமெடி நடிகர்களில் ஒருவரான விவேக் கடந்த சில நாட்களுக்கு முன்னர் திடீரென மாரடைப்பு காரணமாக காலமானார். அவரது மறைவு தமிழ் திரையுலகை மட்டுமின்றி ஒட்டுமொத்த இந்திய திரை உலகையே உலுக்கியது. விவேக்கின் மறைவிற்கு பிரதமர் மோடி உள்பட பல அரசியல் கட்சி தலைவர்களும் திரையுலக பிரபலங்களும் தங்களது இரங்கலை தெரிவித்தனர். மேலும் விவேக் உடனான தங்களது அனுபவங்களையும் திரையுலக பிரபலங்கள் பகிர்ந்து கொண்டனர் என்பது குறிப்பிடத்தக்கது.

இந்த நிலையில் ’தளபதி 65’ படத்தின் படப்பிடிப்பிற்காக ஜார்ஜியா சென்றிருந்த நடிகர் விஜய் விவேக்கின் மறைவு செய்தி கேட்டு அதிர்ச்சி அடைந்ததாக கூறப்பட்டது. இந்த நிலையில் நேற்று ஜார்ஜியாவின் படப்பிடிப்பு முடிந்து சென்னை திரும்பிய விஜய் இன்று காலை விவேக் வீட்டிற்கு சென்றதாக தகவல் வெளியாகியுள்ளது.

விவேக்கின் குடும்பத்தினரை நேரில் சந்தித்து ஆறுதல் கூறியதாகவும் விவேக்கின் புகைப்படத்திற்கு மாலை அணிவித்து அஞ்சலி செலுத்தியதாகவும் தகவல்கள் வெளிவந்துள்ளன. விஜய் நடித்த பல படங்களில் விவேக் நடித்துள்ளார் என்பதும், கடைசியாக அவர் விஜய்யுடன் பிகில் திரைப்படத்தில் இணைந்து நடித்துள்ளார் என்பதும் குறிப்பிடத்தக்கது.