முன்னாள் சென்னை மேயர் சைதை துரைசாமியின் மகன் வெற்றி துரைசாமி இமாச்சல பிரதேசத்தில் நடந்த கார் விபத்தில் காலமான நிலையில் அவரது உடல் நேற்று சென்னைக்கு கொண்டு வரப்பட்டது. முதலமைச்சர் முக ஸ்டாலின் உள்பட தமிழக அமைச்சர்கள் அவரது உடலுக்கு அஞ்சலி செலுத்திய நிலையில் பல திரையுலக பிரபலங்கள் நேரில் சென்று அஞ்சலி செலுத்தினார்.

குறிப்பாக நடிகர் அஜித் நேற்று சைதை துரைசாமி வீட்டிற்கு சென்று அவரது குடும்பத்தினருக்கு ஆறுதல் கூறியதாகவும் தனது நண்பர் மறைவால் அஜித் மிகவும் வருத்தத்தில் இருந்ததாகவும் கூறப்பட்டது. அதுமட்டுமின்றி அஜித்தின் மனைவி ஷாலினி நேற்று முழுவதும் சைதை துரைசாமி வீட்டில் இருந்ததாகவும் கூறப்பட்டது.

இந்த நிலையில் அஜித்தை அடுத்து விஜய்யும் நேற்று வெற்றி துரைசாமி வீட்டிற்கு சென்று அஞ்சலி செலுத்த சென்றபோது கூட்ட நெரிசல் காரணமாக அவரால் வீட்டுக்குள் செல்ல முடியவில்லை என்று கூறப்பட்டது. இதனை அடுத்து அவர் வெற்றி துரைசாமிக்கு அஞ்சலி செலுத்தாமல் திரும்பி விட்டதாகவும் தெரிகிறது.

ஆனால் அதே நேரத்தில் புஸ்ஸி ஆனந்த் வெற்றி துரைசாமிக்கு அஞ்சலி செலுத்திவிட்டு சைதை துரைசாமிக்கு ஆறுதல் கூறியதோடு விஜய் வந்து திரும்பியதையும் அவரிடம் கூறியதாகவும் தகவல் வெளியாகியுள்ளது.