கோடியில் சம்பாதிப்பவர்களுக்கு கூட இல்லாத மனது.. விஜய் டிவி பாலாவின் நெகிழ்ச்சியான உதவி..!
- IndiaGlitz, [Friday,August 18 2023]
கோடியில் சம்பாதிப்பவர்கள் கூட செய்யாத உதவியை ஒரு சில லட்சங்களை சம்பாதிக்கும் பாலா செய்து கொடுத்ததை அடுத்து அவருடைய நெகிழ்ச்சியான உதவிக்கு வாழ்த்துக்கள் குவிந்து வருகிறது.
விஜய் டிவியில் ஒளிபரப்பாகும் ’கலக்கப்போவது யாரு’ என்ற நிகழ்ச்சியின் மூலம் பிரபலமானவர் பாலா. இதனை அடுத்து அவர் ’குக் வித் கோமாளி’ உட்பட பல நிகழ்ச்சிகளில் கலந்து கொண்டார். சில திரைப்படங்களிலும் தற்போது நடித்து வருகிறார் என்பது அது மட்டுமின்றி சில நிகழ்ச்சிகளை தற்போது தொகுத்து வழங்கி வருகிறார் என்பதும் குறிப்பிடத்தக்கது.
இந்த நிலையில் நடிகர் பாலா, ஈரோடு மாவட்டத்தில் உள்ள கடம்பூர் மலைவாழ் மக்களின் மருத்துவ தேவைகளுக்காக சொந்த செலவில் ஆம்புலன்ஸ் வாங்கி கொடுத்து உள்ளார். இந்த ஆம்புலன்ஸில் ஐசியு வசதி உள்பட அனைத்து வசதிகளும் உள்ளது என்று கூறப்படுகிறது.
இந்த ஆம்புலன்ஸ் சேவையை ஈரோடு எஸ்பி தொடங்கி வைத்து பாலாவுக்கு வாழ்த்துக்களை தெரிவித்துள்ளார். ஈரோடு மாவட்டம் கடம்பூர் பகுதியை சுற்றி 12 மலைவாழ் கிராமங்களில் சுமார் 8,000 பேர் வசித்து வருகின்றனர். மலைவாழ் கிராமங்களை சுற்றி வசிக்கும் மக்கள் அவசர தேவைக்காக மருத்துவமனை செல்ல வேண்டும் என்றால் 16 கிலோமீட்டர் செல்ல வேண்டும்.
இந்த கிராமத்திற்கு ஆம்புலன்ஸ் வாகனம் வருவதற்கு ஒரு சில மணி நேரமும் ஆகிவிடும். இதனை அறிந்த பாலா அவர்களுக்கு ஆம்புலன்ஸ் வாங்கி கொடுத்துள்ளார். யாரிடமும் நிதி திரட்டாமல் தனது சொந்த செலவில் இந்த ஆம்புலன்ஸ் அவர் வாங்கி கொடுத்துள்ளார். இதையடுத்து அவருக்கு பாராட்டுக்கள் குவிந்து வருகிறது.