1 மாதத்திற்கு முன்பே 'தெறி'யின் முன்பதிவு ஆரம்பம்.
- IndiaGlitz, [Monday,March 14 2016]
இளையதளபதி விஜய்யின் 'தெறி' திரைப்படம் வரும் ஏப்ரல் 14ஆம் தேதி ரிலீஸாகும் என செய்திகள் வெளிவந்து கொண்டிருக்கும் நிலையில் தற்போது அந்த தேதியை உறுதி செய்யும் வகையில் எஸ்.பி.ஐ சினிமாஸ் இந்த படத்திற்கான முன்பதிவை தொடங்கிவிட்டது.
கோவை மற்றும் சென்னை எஸ்.பி.ஐ சினிமாஸ் திரையரங்குகளில் முதல்நாள் முதல் காட்சியில் இளையதளபதியை பார்க்க விஜய் ரசிகர்கள் போட்டி போட்டுக்கொண்டு முன்பதிவு செய்ததால் ஒருசில வினாடிகள் முதல் நாளுக்குரிய டிக்கெட்டுக்கள் அனைத்தும் விற்பனையாகி முடிந்துவிட்டது.
பொதுவாக ஒரு படத்திற்கு மூன்று முதல் ஒரு வாரத்திற்கு முன்புதான் ரிசர்வேஷன் தொடங்கப்படும். ஆனால் 'தெறி' படத்திற்கு ஒரு மாதத்திற்கு முன்பே ரிசர்வேஷன் தொடங்கியுள்ளது. அதுவும் அதிகாரபூர்வமாக இன்னும் ரிலீஸ் தேதியை தயாரிப்பாளர் அறிவிக்கும் முன்பே முதல் நாளுக்குரிய ரிசர்வேஷன் முடிந்துவிட்டது என்பது குறிப்பிடத்தக்கது.
இந்நிலையில் இன்று 'தெறி' படத்தின் தயாரிப்பாளர் கலைப்புலி எஸ்.தாணு அதிகாரபூர்வமாக ரிலீஸ் தேதியை அறிவிக்கவுள்ளதாக இந்த படத்தின் இசையமைப்பாளர் ஜி.வி.பிரகாஷ் தன்னுடைய சமூக வலைத்தளத்தில் தெரிவித்துள்ளார்