தனுஷ் தயாரிப்பில் சமீபத்தில் வெளிவந்த 'நானும் ரவுடிதான்' படத்தின் வெற்றி நடிகர் விஜய்சேதுபதியை உச்சிக்கே கொண்டு சென்றுவிட்டது என்றுதான் சொல்ல வேண்டும். தற்போது அதிக படங்களில் நடித்து கொண்டிருக்கும் நடிகர்கள் பட்டியலில் முன்னணியில் உள்ள விஜய் சேதுபதி நடித்த மூன்று படங்கள் வரும் பிப்ரவரி மாதம் அதாவது அடுத்த மாதம் தொடர்ந்து வெளியாகவுள்ளதாக தகவல்கள் வெளிவந்துள்ளது.

'சூதுகவ்வும்' இயக்குனர் நலன்குமாரசாமி இயக்கிய 'காதலும் கடந்து போகும்' என்ற திரைப்படம் பிப்ரவரி 12ஆம் தேதி ரிலீஸ் ஆகவுள்ளதாக கூறப்படுகிறது. அதே நேரத்தில் பிப்ரவரி மூன்றாம் மற்றும் நான்காவது வாரங்களில் விஜய்சேதுபதி நடித்த 'இடம் பொருள் ஏவல்' மற்றும் 'சேதுபதி' ஆகிய படங்கள் ரிலீஸ் செய்ய அந்தந்த படங்களின் தயாரிப்பாளர்கள் திட்டமிட்டுள்ளதாக தெரிகிறது. எனவே வரும் பிப்ரவரி மாதம் விஜய்சேதுபதியின் மாதமாக மாறும் நிலை ஏற்பட்டுள்ளது.

இந்த படங்களை அடுத்து மெல்லிசை, தர்மதுரை, ஆண்டவன் கட்டளை ஆகிய படங்களில் விஜய்சேதுபதி நடித்து வருகிறார். இந்த படங்கள் அனைத்தும் இவ்வாண்டின் முதல் பாதியிலேயே வெளியாகும் என எதிர்பார்க்கப்படுகிறது.