தனுஷ் தயாரிப்பில் மீண்டும் விஜய்சேதுபதி
- IndiaGlitz, [Sunday,October 25 2015]
தனுஷ் தயாரிப்பில் விஜய்சேதுபதி, நயன்தாரா நடிப்பில் கடந்த 21ஆம் தேதி வெளியான 'நானும் ரெளடிதான்' திரைப்படம் ஊடகங்கள் மற்றும் ரசிகர்களின் மாபெரும் வரவேற்பை பெற்றுள்ளது என்பதை ஏற்கனவே பார்த்தோம். இந்த படத்திற்கு கிடைத்த மாபெரும் வரவேற்பு காரணமாக நேற்று இன்றும் சென்னை உள்பட முக்கிய நகரங்களில் காலை சிறப்பு காட்சிகள் திரையிடப்படுகிறன. எனவே முதல்நாள் வசூலைவிட அடுத்தடுத்த நாட்களில் இந்த படத்தின் வசூல் அதிகரித்துள்ளதாக தகவல்கள் வெளிவந்துள்ளது.
தனுஷ் தயாரிப்பில் முதன்முதலாக நடித்த விஜய்சேதுபதிக்கு இந்த படம் உண்மையிலேயே ஒரு திருப்புமுனையாக அமைந்துள்ளது. எனவே மீண்டும் தனுஷ் படத்தில் விஜய்சேதுபதி ஒரு படத்தில் நடிக்கவுள்ளதாக செய்திகள் வெளிவந்துள்ளது. தனுஷின் வொண்டர்பார் நிறுவனத்தில் 'எதிர்நீச்சல்' மற்றும் 'காக்கி சட்டை' ஆகிய இரண்டு படங்களில் சிவகார்த்திகேயன் நடித்துள்ளதை அடுத்து தற்போது விஜய்சேதுபதியும் இரண்டாவது படத்தில் நடிக்கவுள்ளார்.
இந்த படம் 'நானும் ரெளடிதான்' படத்தின் இரண்டாம் பாகமா? அல்லது வேறு படமா? என்பது உள்பட இந்த படம் குறித்த தகவல்கள் விரைவில் வெளிவரும் என்று கூறப்படுகிறது.