கோலிவுட் திரையுலகில் தற்போது அதிகளவில் அரசியல் படங்கள் உருவாகி வருகிறது. விஜய்யின் 'சர்கார்', விஜய் தேவரகொண்டாவின் 'நோட்டா' போன்ற அரசியல் படங்கள் கடந்த ஆண்டு வெளியான நிலையில் இந்த ஆண்டு சூர்யாவின் 'என்.ஜி.கே', 'ஆர்ஜே பாலாஜியின் 'எல்.கே.ஜி' உள்பட ஒருசில அரசியல் படங்கள் உருவாகியுள்ளது.

இந்த நிலையில் மக்கள் செல்வன் விஜய்சேதுபதியும் அரசியல் படம் ஒன்றில் நடிக்கவுள்ளார். விஜய் சேதுபதி நடிப்பில் அறிமுக இயக்குனர் டெல்லிபிரசாத் தீனதயாள் இயக்கத்தில் ஒரு படம் உருவாகவுள்ளது என்றும் இந்த படத்திற்கு 'துக்ளக்' என்று டைட்டில் வவக்கப்பட்டுள்ளதாக வெளிவந்த செய்தியை நேற்று பார்த்தோம். இந்த நிலையில் இந்த படம் ஒரு அரசியல் படம் என்றும், விஜய்சேதுபதி இந்த படத்தில் அரசியல்வாதியாக நடிக்கவிருப்பதாகவும் பேட்டி ஒன்றில் இயக்குனர் கூறியுள்ளார்.

இந்த படத்தில் விஜய்சேதுபதியின் அரசியல் கேரக்டர் மாஸாக இருகும் என்றும், அதே நேரத்தில் ரசிகர்கள் விரும்பும் வகையில் ஃபேண்டஸியாக இருக்கும் என்றும் அவர் கூறியுள்ளார். இந்த படத்திற்கு பாலாஜி தரணிதரன் காரசாரமான வசனங்களை எழுதவுள்ளார்.

'96' உள்பட பல வெற்றிப்படங்களுக்கு இசையமைத்த கோவிந்த் வசந்தா இசையில் '96' விநியோகிஸ்தர் லலிதாகுமார் தயாரிப்பில் உருவாகும் இந்த படத்தின் படப்பிடிப்பு வரும் ஜூன் மாதம் சென்னையில் தொடங்கவுள்ளதாக இயக்குனர் டெல்லி பிரசாத் தெரிவித்துள்ளார்.. இவர் 'சில்லுன்னு ஒரு காதல்' இயக்குனர் கிருஷ்ணா, பாலாஜி தரணீதரன், பிரேம்குமார் உள்ளிட்ட இயக்குனர்களிடம் உதவி இயக்குனராக பணியாற்றியவர் என்பது குறிப்பிடத்தக்கது