விஜய்சேதுபதி நடிப்பில் கே.வி.ஆனந்த் இயக்கிய 'கவண்' திரைப்படத்தின் டிரைலர் சமீபத்தில் வெளியாகி மாபெரும் வரவேற்பை பெற்ற நிலையில் இந்த படத்தின் சென்சார் தகவல்கள் மற்றும் ரிலீஸ் தேதி குறித்த தகவல்கள் தற்போது வெளிவந்துள்ளது.

'கவண்' படத்திற்கு சென்சார் அதிகாரிகள் 'யூ' சான்றிதழ் கொடுத்துள்ளனர். இதனால் இந்த படம் தமிழக அரசின் 30% வரிவிலக்கை பெறும் வாய்ப்பை பெற்றுள்ளது. மேலும் இந்த படத்தின் சென்சார் சான்றிதழ் கிடைத்துவிட்டதால் தற்போது அதிகாரபூர்வமான ரிலீஸ் தேதியையும் ஏஜிஎஸ் நிறுவனம் அறிவித்துள்ளது. இதன்படி இந்த படம் மார்ச் 31ஆம் தேதி உலகம் முழுவதும் ரிலீஸ் ஆகவுள்ளது. இந்த தகவலை உறுதி செய்யும் வகையில் ரிலீஸ் தேதியுடன் கூடிய புதிய போஸ்டர் ஒன்றும் இன்றைய நாளிதழ்களிலும் சமூக இணையதளங்களிலும் வெளியாகியுள்ளது. ஏற்கனவே இந்த படம் மார்ச் இறுதியில் வெளியாகும் என்று நமது இணையதளத்தில் செய்தி வெளியானது என்பது குறிப்பிடத்தக்கது.

விஜய்சேதுபதிக்கு ஜோடியாக மீண்டும் மடோனா செபாஸ்டியன் நடித்துள்ள இந்த படத்தில் டி.ராஜேந்தர், விக்ராந்த், தமிழரசன், ஜெகன் மற்றும் பாண்டியராஜன் ஆகியோர் முக்கிய கேரக்டர்களில் நடித்துள்ளனர். ஹிப் ஹாப் தமிழா ஆதி இசையில், அபிநந்தன் ராமானுஜன் ஒளிப்பதிவில், அந்தோணி படத்தொகுப்பில் உருவாகியுள்ள இந்த படத்தை மிகப்பெரிய பட்ஜெட்டில் ஏஜிஎஸ் நிறுவனம் தயாரித்துள்ளது.