விஜய் சேதுபதியுடன் முதல்முறையாக இணையும் சமுத்திரக்கனி
- IndiaGlitz, [Wednesday,July 29 2015]
விஜய் சேதுபதி, சஞ்சிதா ஷெட்டி, பாபிசிம்ஹா மற்றும் பலர் நடித்த 'சூது கவ்வும்' என்ற வெற்றிப்படத்தை இயக்கிய இயக்குனர் நலன் குமாரசாமி தற்போது இயக்கியுள்ள ஒரு புதிய படத்தில் மீண்டும் விஜய் சேதுபதி ஹீரோவாக நடித்து வருகிறார் என்பதை ஏற்கனவே பார்த்தோம். இந்த படத்தின் படப்பிடிப்பு சமீபத்தில் முடிந்துள்ள நிலையில் இந்த படத்தின் இன்னொரு முக்கிய நடிகர் நடித்துள்ள தகவல் தற்போது கிடைத்துள்ளது.
பிரபல இயக்குனர் மற்றும் நடிகரான சமுத்திரக்கனி, சமீபத்தில் 'மாஸ்' படத்தில் வில்லனாக மிரட்டிய நிலையில், இந்த படத்திலும் மீண்டும் வில்லனாக நடித்துள்ளதாக தகவல்கள் கிடைத்துள்ளது. விஜய் சேதுபதியும், சமுத்திரக்கனியும் இணைந்து நடிப்பது இதுதான் முதல்முறை என்பது குறிப்பிடத்தக்கது. இந்த படத்தின் போஸ்ட் புரடொக்ஷன் பணிகள் விறுவிறுப்பாக நடைபெற்று வருவதாகவும், விரைவில் இந்த படத்தில் பாடல் வெளியீட்டு தேதி உள்பட அனைத்து அறிவிப்புகளும் வெளிவரும் என படக்குழுவினர் கூறியுள்ளனர்.
இந்நிலையில் விஜய்சேதுபதி தயாரித்து நடித்துள்ள 'ஆரஞ்சுமிட்டாய்' திரைப்படம் நாளை மறுநாள் ரிலீஸாகவுள்ளது. விஜய் சேதுபதியுடன் ரமேஷ் திலக், ஜெயப்பிரகாஷ், பாலா, அஷ்ரிதா உள்பட பலர் நடித்துள்ள இந்த படத்தை பிஜு விஸ்வநாதன் இயக்கியுள்ளார். ஜஸ்டின் பிரபாகரன் இந்த படத்தின் இசையமைத்துள்ளார்.