'தர்மதுரை' படப்பிடிப்பில் விஜய்சேதுபதி காயம்
- IndiaGlitz, [Tuesday,February 02 2016]
விஜய்சேதுபதி நடித்த 'காதலும் கடந்து போகும்' மற்றும் 'சேதுபதி' ஆகிய இரண்டு படங்களும் அடுத்தடுத்து இம்மாதம் வெளியாகவுள்ள நிலையில் அவர் நடித்து வரும் மற்றொரு படமான 'தர்மதுரை' படத்தின் படப்பிடிப்பு தேனி பகுதியில் விறுவிறுப்பாக நடைபெற்று வருகிறது.
இந்நிலையில் தேனியில் 'தர்மதுரை' படப்பிடிப்பில் இருந்து விஜய்சேதுபதிக்கு காயம் ஏற்பட்டுள்ளதாக தகவல்கள் வெளிவந்துள்ளது. தர்மதுரை' படத்தின் சண்டைக்காட்சி ஒன்றில் விஜய்சேதுபதி ரவுடிகளுடன் மோதும் காட்சி ஒன்று படமாக்கபட்டது. இந்த படப்பிடிப்பில் ஸ்டண்ட் நடிகர் ஒருவர் விஜய்சேதுபதியின் முகத்தில் குத்துவது போன்ற காட்சி ஒன்றை படமாக்கியபோது விஜய்சேதுபதியின் முகத்தில் உண்மையாகவே குத்துவிழுந்தது. இதனால் விஜய்சேதுபதியின் கண் சிவந்து வீங்கியது.
இதனையடுத்து விஜய் சேதுபதி மதுரை மருத்துவமனையில் அனுமதிக்கப்பட்டு சிகிச்சை பெற்றார். இருப்பினும் மறுநாள் விஜய்சேதுபதி வீங்கிய கண்களுடன் படப்பிடிப்பில் கலந்து கொண்டதாக தகவல்கள் வெளிவந்துள்ளது. சீனுராமசாமி இயக்கி வரும் 'தர்மதுரை' படத்தில் விஜய்சேதுபதிக்கு ஜோடியாக தமன்னா நடித்து வருகிறார் என்பது குறிப்பிடத்தக்கது.