விஜய்சேதுபதி, சமந்தா நடிப்பில் இயக்குனர் தியாகராஜன் குமாரராஜா இயக்கிய 'சூப்பர் டீலக்ஸ்' திரைப்படம் வரும் வெள்ளியன்று வெளியாகவுள்ளது. இந்த படத்தின் புரமோஷன் பணிகள் முழுவீச்சில் நடந்து வரும் நிலையில் இன்று இந்த படம் சென்சார் செய்யப்பட்டது.

'சூப்பர் டீலக்ஸ் படத்தை பார்த்த சென்சார் அதிகாரிகள் படத்திற்கு 'ஏ' சான்றிதழ் கொடுத்துள்ளனர். இதனால் 18 வயதுக்கு கீழ் உள்ளவர்கள் இந்த படத்தை பார்க்க முடியாத நிலை ஏற்பட்டுள்ளது. அதுமட்டுமின்றி இந்த படம் தொலைக்காட்சிகளில் ஒளிபரப்பவும் வாய்ப்பு இல்லாத நிலை உருவாகிவிட்டது.

இயக்குனர் தியாகராஜன் குமாரராஜாவின் முந்தைய படமான 'ஆரண்ய காண்டம்' திரைப்படமும் 'ஏ' சான்றிதழ் பெற்ற படம் என்பது குறிப்பிடத்தக்கது. மேலும் இந்த படத்தின் ரன்னிங் டைம் 175 நிமிடங்கள் ஆகும். அதாவது சுமார் 3 மணி நேரம் ஓடும் நீளமான படம் என்பதும் குறிப்பிடத்தக்கது.

திருநங்கை வேடத்தில் விஜய்சேதுபதி நடித்துள்ள இந்த படத்தில் பகத் பாசில், சமந்தா, மிஷ்கின், ரம்யாகிருஷ்ணன், காயத்ரி, பகவதி பெருமாள், உள்பட பலர் நடித்துள்ளனர். இந்த படத்திற்கு யுவன்ஷங்கர் ராஜா இசையமைத்துள்ளார்.