மக்கள் செல்வன் விஜய்சேதுபதி நடித்த 'சங்கத் தமிழன்' திரைப்படம் வரும் நவம்பர் இரண்டாம் வாரம் வெளியாக உள்ள நிலையில் அவர் தற்போது சுமார் அரை டஜனுக்கும் அதிகமான படங்களில் நடித்து வருகிறார். அவற்றில் ஒன்று க/பெ ரணசிங்கம். இந்தப் படத்தில் விஜய்சேதுபதியின் ஜோடியாக ஐஸ்வர்யா ராஜேஷ் நடித்து வருகிறார்.

இந்த படத்தின் படப்பிடிப்பு கடந்த சில நாட்களாக விறுவிறுப்பாக நடைபெற்று வரும் நிலையில் கடந்த தீபாவளி அன்று இந்த படத்தின் இறுதிக்கட்ட படப்பிடிப்பு தொடங்குவதாக அறிவிக்கப்பட்டது. மேலும் இந்த படம் வரும் 2020ஆம் ஆண்டு ஜனவரியில் வெளிவரும் என்று இந்த படத்தின் தயாரிப்பு நிறுவனமான கேஜேஆர் ஸ்டூடியோஸ் நிறுவனம் தெரிவித்துள்ளது.

குணசித்திர நடிகர் பெரிய கருப்புத்தேவர் மகன் விருமாண்டி இயக்கி வரும் இந்த படத்திற்கு ஜிப்ரான் இசையமைத்து வருகிறார். வேலராமமூர்த்தி, பவானிஸ்ரீ, சமுத்திரக்கனி உள்பட பலர் இந்த படத்தில் முக்கிய கேரக்டர்களில் நடித்து வருகின்றனர். பீட்டர் ஹெய்ன் ஸ்டண்ட் இயக்கத்தில் சண்முகம் முத்துசாமியின் வசனத்தில் இந்த படம் உருவாகி வருகிறது என்பது குறிப்பிடத்தக்கது.

ஏற்கனவே 2020ஆம் ஆண்டு பொங்கல் தினத்தில் ரஜினியின் 'தர்பார்' உள்பட ஒருசில படங்கள் ரிலீஸாக உள்ள நிலையில் இந்த படமும் பொங்கல் ரிலீஸ் படங்களின் பட்டியலில் இணையுமா? என்பதை பொறுத்திருந்து பார்ப்போம்.