பீட்சா, ஜிகர்தண்டா என்ற இரண்டு வெற்றி படங்களை இயக்கிய இயக்குனர் கார்த்திக் சுப்புராஜின் மூன்றாவது படமான 'இறைவி' படத்திற்கு பெரும் எதிர்பார்ப்பு ஏற்பட்டுள்ளது. ரசிகர்களின் எதிர்பார்ப்பை வரும் ஜூன் 3ஆம் தேதி பூர்த்தி செய்யவுள்ள இந்த படத்தில் விஜய் சேதுபதி, பாபிசிம்ஹா, எஸ்.ஜே.சூர்யா, அஞ்சலி, கமாலினி முகர்ஜி, கருணாகரன், ராதாரவி, வடிவுக்கரசி உள்ளிட்ட பலர் நடித்துள்ளனர். சந்தோஷ் சுப்பிரமணியம் இந்த படத்திற்கு இசையமைத்துள்ளார்.

இந்த படத்தின் டீசர், டிரைலர், பாடல்கள் ஆகியவை ஏற்கனவே பெரிய அளவில் வரவேற்பை பெற்ற நிலையில் இன்று மாலை ஆறு மணிக்கு இறைவி படக்குழுவினர் ஒரு முக்கிய இண்ட்ரெஸ்ட்டிங் அறிவிப்பு ஒன்றை வெளியிட உள்ளதாக தகவல்கள் வெளிவந்துள்ளது. இந்த தகவலை கார்த்திக் சுப்புராஜ் தனது சமூக வலைத்தளத்தில் உறுதி செய்துள்ளார். அந்த இண்ட்ரெஸ்ட்டிங் தகவல் என்ன என்பதை அறிய இன்னும் சில மணி நேரங்கள் பொறுத்திருப்போம்.

பல வெற்றிப்படங்களை தயாரித்த சி.வி.குமார் 'இறைவி' படத்தை தயாரித்துள்ளார். கார்த்திக் சுப்புராஜ் இயக்கிய 'பீட்சா' படத்தையும் இவர்தான் தயாரித்தார் என்பது குறிப்பிடத்தக்கது. இந்த படத்திற்கு சிவகுமார் விஜயன் ஒளிப்பதிவும், விவேக் ஹர்ஷன் படத்தொகுப்பும் செய்துள்ளனர்.