இளையதளபதி விஜய் நடிப்பில் அட்லி இயக்கத்தில் கலைப்புலி எஸ்.தாணு தயாரிப்பில் கடந்த தமிழ்ப்புத்தாண்டு தினத்தில் உலகம் முழுவதும் பிரமாண்டமாக ரிலீஸ் ஆன 'தெறி' திரைப்படத்தின் தமிழக வசூல் ஒரே வாரத்தில் ரூ.47 கோடி ஆனது என்பதை நேற்று பார்த்தோம். இந்நிலையில் இந்த படம் தமிழகம் மட்டுமின்றி, அமெரிக்கா, கனடா, ஆஸ்திரேலியா, மற்றும் ஐரோப்பிய நாடுகளிலும் நல்ல கலெக்ஷன் ஆனது என்பதையும் பார்த்தோம்,

இந்நிலையில் 'தெறி' திரைப்படம் ரிலீஸ் ஆகி ஆறே நாட்களில் ரூ.100 கோடி வசூல் கிளப்பில் இணைந்துள்ளது.விஜய்யின் 'கத்தி' திரைப்படம் 14 நாட்களில் ரூ.100 கோடி வசூல் செய்த நிலையில் தெறி' ஒரு வாரத்திற்குள்ளே ரூ.100 கோடி வசூல் செய்து சாதனை புரிந்துள்ளது. மிகக்குறுகிய நாட்களில் ரூ.100 கோடி வசூல் செய்த தமிழ்த்திரைப்படம் என்ற சாதனையை ஏற்படுத்தியது மட்டுமின்றி ரூ.100 கோடி வசூல் படத்தை இயக்கிய இளம் இயக்குனர் என்ற பெருமையும் அட்லிக்கு கிடைத்துள்ளது.

'தெறி' திரைப்படம் உலகம் முழுவதும் ரூ.100 கோடி வசூல் செய்ததை விஜய்யின் சமூக வலைத்தளம் உறுதி செய்துள்ளது என்பது குறிப்பிடத்தக்கது. மேலும் இரண்டாவது வாரமாக பெரும்பாலும் ஹவுஸ்புல் காட்சிகளாக 'தெறி' திரையரங்குகளில் ஓடிக்கொண்டிருப்பதால் இந்த படம் வசூலில் புதிய சாதனையை ஏற்படுத்தும் என எதிர்பார்க்கப்படுகிறது.