'தெறி'யின் ஒருவார வசூல் எவ்வளவு தெரியுமா?
- IndiaGlitz, [Thursday,April 21 2016]
இளையதளபதி விஜய் நடித்த 'தெறி' திரைப்படம் கடந்த தமிழ்ப்புத்தாண்டு தினத்தில் பிரமாண்டமாக ரிலீஸ் ஆகி இரண்டாவது வாரமாக வெற்றிகரமாக உலகம் முழுவதும் திரையரங்குகளில் ஓடிக்கொண்டிருக்கின்றது. 'தெறி' திரைப்படம் திரையிட்ட அனைத்து இடங்களிலும் விநியோகிஸ்தர்களுக்கு நல்ல லாபம் கிடைத்துள்ளதாக செய்திகள் வெளிவந்து கொண்டிருக்கும் நிலையில் இந்தப் படத்தின் முதல் வார வசூல் குறித்த தகவல்கள் தற்போது வெளிவந்துள்ளது.
'தெறி' திரைப்படம் ஒரு வாரத்தில் தமிழகத்தில் மட்டும் ரூ.46 முதல் ரூ.47 கோடி வரை வசூலாகியிருப்பதாக தெரிய வந்துள்ளது. அதேபோல் சென்னையில் மட்டும் சுமார் ரூ.5.53 கோடி வசூலாகியுள்ளது. செங்கல்பட்டு ஏரியாவில் இந்த படம் திரையிடப்பட்டிருந்தால் வசூல் ரூ.50 கோடியை தாண்டியிருக்கும் என்பது குறிப்பிடத்தக்கது.
தமிழகத்தைப் போலவே அண்டை மாநிலங்களான கேரளா, ஆந்திரா, தெலுங்கானா ஆகிய மாநிலங்களிலும் அமெரிக்கா, கனடா, பிரிட்டன், பிரான்ஸ், ஆஸ்திரேலியா உள்பட பல நாடுகளிலும் 'தெறி' நல்ல வசூலை பெற்றுள்ளது.