விரைவில் 'புலி' படத்தின் 2வது டிரைலர்
- IndiaGlitz, [Wednesday,September 23 2015]
இளையதளபதி விஜய் நடித்த 'புலி' திரைப்படத்தின் டிரைலர் கடந்த மாதம் வெளியாகி இந்திய அளவில் அதிக லைக்குகள் பெற்ற டிரைலர் என்பது மட்டுமின்றி பல சாதனைகளை புரிந்தது. இந்த படத்தின் டிரைலருக்கு சமூக வலைத்தளங்களில் கிடைத்த வரவேற்பு கோலிவுட்டையே திரும்பி பார்க்க வைத்துவிட்டது. சமூகவலைத்தளங்களில் தினமும் இந்த படத்தின் ஏதாவது ஒரு செய்தி டிரெண்டாகி வருகிறது. இந்த படத்தின் டிரைலரின் மாபெரும் வெற்றியே படத்தின் வெற்றிக்கு ஒரு முன்னோட்டமாக அமைந்துள்ளதாக பலர் கருத்து தெரிவித்துள்ளனர்.
இந்நிலையில் 'புலி' படத்தின் அடுத்த டிரைலர் இன்னும் ஓரிரு நாட்களில் வெளிவரவுள்ளதாக கூறப்படுகிறது. படத்தின் ரிலீஸ் தேதிக்கு இன்னும் ஒரு வாரமே இருக்கும் நிலையில் இரண்டாவது டிரைலர் இன்னும் சில முக்கிய காட்சிகளுடன் அமைக்கப்பட்டுள்ளதாக கூறப்படுகிறது. இந்த டிரைலரும் முந்தைய டிரைலரை போலவே பல சாதனைகளை புரியும் என எதிர்பார்க்கப்படுகிறது. இந்த இரண்டாவது டிரைலர் தமிழில் மட்டுமின்றி இந்தி மற்றும் தெலுங்கிலும் வெளிவரவுள்ளது என்று கூறப்படுகிறது.
இந்நிலையில் புலி' படத்திற்கான பிரிண்ட்டுக்கள் தயாராகி வருவதாகவும், வரும் சனிக்கிழமை வெளிநாட்டுக்கு செல்ல வேண்டிய அனைத்து பிரிண்டுக்களும் அனுப்பப்படும் என்றும், அத்துடன் தற்போது தயாராகவுள்ள ஆயிரக்கணக்கான புரமோஷன் போஸ்டர்களும் அனுப்பப்படும் என்றும் படக்குழுவினர்களால் கூறப்படுகிறது.