వివాదంలోకి హీరో విజయ్ సినిమా
- IndiaGlitz, [Tuesday,September 24 2019]
త‌మిళ స్టార్ హీరో విజ‌య్‌కి వివాదాలేం కొత్త కావు..ఆయ‌న ప్రతి సినిమాకు ఏదో ఒక వివాదం న‌డుస్తూనే ఉంటుంది. ఆయ‌న త‌మిళ ప్ర‌భుత్వాన్నో, కేంద్ర ప్ర‌భుత్వాన్నో విమ‌ర్శిస్తూ సినిమాలు తీయ‌డం అందుకు ప్ర‌భుత్వం త‌ర‌పును వ్య‌క్తులు సినిమాపై ఆగ్ర‌హాన్ని ప్ర‌క‌టించ‌డం సాధార‌ణంగా జ‌రుగుతూ వ‌స్తున్నాయి. ఇప్పుడు విజయ్ హీరోగా న‌టిస్తోన్న తాజా చిత్రం 'బిగిల్'. విజయ్, అట్లీ కాంబినేషన్లో రూపొందుతోన్న హ్యాట్రిక్ మూవీ ఇది. ఇటీవ‌ల విడుద‌లైన ఈ సినిమా ఫ‌స్ట్ లుక్ పోస్ట‌ర్ వివాదానికి దారి తీసింది. ఫ‌స్ట్ లుక్ మ‌త్స్య, మాంస వ్యాపారుల‌ను అవ‌మానించేలా ఉందంటూ కొంద‌రు విజ‌య్‌పై కోవై క‌లెక్ట‌ర్‌కు ఫిర్యాదు చేశారు.
మ‌త్స్య, మాంస వ్యాపారులు వృత్తి చేసే స‌మ‌యంలో ఎంతో ప‌విత్రంగా భావించే క‌త్తులుండే పీఠంపై విజయ్ కాలు పెట్టుకుని కూర్చున్నట్లు లుక్‌ను విడుదల చేశారు. ఇది మ‌త్స్య, మాంస వ్యాపారుల‌ను అవ‌మానించేలా ఉంద‌ని, సినిమాలోని స‌ద‌రు స‌న్నివేశాల‌ను తొల‌గించుకుంటే రాష్ట్ర వ్యాప్తంగా ఆందోళ‌న‌లు చేస్తామ‌ని ఫిర్యాదులో పేర్కొన్నారు.
హీరో విజయ్ న‌టించిన త‌లైవా(అన్న), తెరి(పోలీస్‌), స‌ర్కార్‌, మెర్స‌ల్‌(అదిరింది) సినిమాలు కూడా విడుదల ముందు వివాదాల‌కు కార‌ణ‌మ‌య్యాయి. ఇప్పుడు ఈ వ‌రుస‌లో బిగిల్ చిత్రం కూడా చేరింది. బిగిల్ చిత్రాన్ని తెలుగులో ఈస్ట్ కోస్ట్ ప్రొడ‌క్ష‌న్స్ బ్యాన‌ర్‌పై మ‌హేశ్ కొనేరు విడుదల చేస్తున్నారు. తెలుగులో ఈ చిత్రానికి విజిల్ అనే టైటిల్ ప‌రిశీల‌న‌లో ఉన్న‌ట్లు స‌మాచారం. దీపావ‌ళికి సినిమాను విడుదల చేయాల‌ని ద‌ర్శ‌క నిర్మాత‌లు భావిస్తున్నారు. ఎ.ఆర్‌.రెహ‌మాన్ సంగీతం అందించిన ఈ సినిమా ఆడియో రీసెంట్‌గా విడుద‌లైంది.