234 தொகுதிகளிலும் மதிய உணவு.. பசிப்பிணியை போக்கிடும் தளபதி விஜய்..!
- IndiaGlitz, [Thursday,May 25 2023]
ஒவ்வொரு ஆண்டும் மே 28ஆம் தேதி உலக பட்டினி தினம் அனுசரிக்கப்படும் நிலையில் அன்றைய தினத்தில் தமிழகத்தில் உள்ள 234 தொகுதிகளில் உள்ள மக்களுக்கு மதிய உணவு அளிக்க ரசிகர்களுக்கு தளபதி விஜய் அறிவுறுத்தியுள்ளார். இதன் மூலம் தமிழ்நாட்டில் பசிப்பிணியை போக்க ஒரு ஆரம்ப முயற்சியை அவர் எடுத்து உள்ளார் என்பது குறிப்பிடத்தக்கது. இது குறித்து விஜய் மக்கள் இயக்கம் சார்பில் வெளியிடப்பட்டுள்ள அறிக்கையில் கூறப்பட்டுள்ளதாவது:
உலகம் முழுவதும் மே 28-ஆம் தேதி உலக பட்டினி தினம் அனுசரிக்கப்படுகிறது. உலகளவில் நீண்டகால பட்டினியால் வாடும் மக்களை பற்றிய விழிப்புணர்வு ஏற்படுத்தும் நோக்கத்துடன் இந்த தினம் ஆண்டு தோறும் அனுசரிக்கப்படுகிறது.
தளபதி அவர்களின் சொல்லுக்கிணங்க, உலக பட்டினி தினத்தினை முன்னிட்டு பசி எனும் பிணி போக்கிடும் விழிப்புணர்வு ஏற்படுத்தும் வகையில் தளபதி விஜய் மக்கள் இயக்கம் சார்பாக தளபதி விஜய் ஒரு நாள் மதிய உணவு சேவையகம் திட்டம் மூலம் வருகின்ற 28.05.2023 (ஞாயிற்றுக்கிழமை) அன்று பகல் 11 மணியளவில் தமிழகத்தில் உள்ள 234 தொகுதிகளிலும் நகரம், ஒன்றியம் மற்றும் பகுதிகளில் உள்ள ஏழை எளிய மக்கள் பயன்பெறும் வகையில் ஒருவேளை (மதிய) உணவு வழங்க ஏற்பாடு செய்யப்பட்டுள்ளது.
மேலும் தமிழகத்தை தொடர்ந்து புதுச்சேரி, கேரளா, கர்நாடகா, ஆந்திரா மற்றும் மஹாராஷ்டிரா உள்ளிட்ட மாநிலங்களில் உள்ள தளபதி விஜய் மக்கள் இயக்கம் சார்பாக பட்டினி தினத்தை முன்னிட்டு ஒரு நாள் (மதிய) உணவு வழங்க ஏற்பாடுகள் செய்யப்பட்டடுள்ளது.
இதன் மூலம் பசியால் வாடும் மக்களுக்கு இயன்றவரை உணவளித்து பசியினை போக்கும் விழிப்புணர்வினை சமுதாயத்தில் ஏற்படுத்தும் நோக்கத்துடன் தளபதி விஜய் மக்கள் இயக்கம் இந்த நலப்பணி செய்யப்படுகிறது.
இவ்வாறு அந்த அறிக்கையில் தெரிவிக்கப்பட்டுள்ளது.
On World Hunger Day (May 28). Team #VijayMakkalIyakkam will be providing free lunch in all 234 constituencies in Tamil Nadu. Also, VMI extends its support to AP, TG, Maharashtra, Kerala, and Karnataka too. Together, let's fight hunger and make a difference. @actorvijay pic.twitter.com/FUL0P8drpx
— Actor Vijay Team (@ActorVijayTeam) May 25, 2023