கொரோனா வைரசுக்கு எதிராக போராடி வரும் மத்திய மாநில அரசுகள் மற்றும் அண்டை மாநில அரசுகளுக்கு என மொத்தம் 1.30 கோடி ரூபாய் நிதி உதவி செய்த தளபதி விஜய், பொருளாதாரத்தால் பாதிக்கப்பட்ட தனது ரசிகர் மன்ற நிர்வாகிகளுக்கும் ரசிகர்களுக்கும் நேரடியாக அவர்களது வங்கிக்கணக்கில் தலா ரூபாய் 5000 அனுப்பி உள்ளார் என்பது குறித்த செய்தியையும் பார்த்தோம்.

இந்த நிலையில் ஏற்கனவே பொதுமக்கள், காவல்துறையினர், ,சுகாதாரப் பணியாளர்கள், தூய்மை பணியாளர்கள் ஆகியோருக்கு விஜய் ரசிகர்கள் அவ்வப்போது உதவிகளை செய்து வருகிறார் என்பது தெரிந்ததே. இந்த நிலையில் தற்போது மதுரை மாவட்டம் வாடிப்பட்டி பகுதியில் வசிக்கும் தப்பாட்ட கலைஞர்கள் வாழ்வாதாரம் பாதிக்கப்பட்டு உள்ள நிலையில் அவர்களுக்கும் விஜய் ரசிகர்கள் உதவி செய்துள்ளனர்.

வருடத்திற்கு நான்கு மாதங்கள் மட்டுமே வருமானம் கிடைக்கும் தப்பாட்ட கலைஞர்கள் தற்போது ஊரடங்கு உத்தரவு காரணமாக மிகுந்த சிரமத்திற்கு உள்ளாகி இருப்பதாக வெளியான செய்தியை பார்த்த விஜய் மக்கள் மன்ற இயக்கத்தினர் உடனடியாக 20 குடும்பங்களைச் சேர்ந்த தப்பாட்ட கலைஞர்களுக்கு உதவி செய்தனர். அவர்களுக்கு தலா 10 கிலோ அரிசி மளிகை பொருட்கள் ஆகியவற்றை அடங்கிய பையை கொடுத்ததாகவும், இதற்கு தப்பாட்ட கலைஞர்கள் விஜய் மக்கள் மன்றத்தின் நிர்வாகிகளுக்கு நன்றி தெரிவித்துள்ளதாகவும் செய்திகள் வெளியாகியுள்ளது.