தளபதி விஜய் நடிப்பில் இயக்குனர் ஏஆர் முருகதாஸ் இயக்கிய வெற்றி படங்களில் ஒன்று ’துப்பாக்கி’. கடந்த 2012ஆம் ஆண்டு வெளியான இந்த திரைப்படம் வசூலில் மிகப்பெரிய சாதனை செய்தது என்பது குறிப்பிடத்தக்கது.

இந்த நிலையில் இந்த படத்தில் விஜய்யின் தங்கையாக நடித்தவர்களில் ஒருவரான சஞ்சனா சாரதி. இவர் தற்போது நாயகி ஆகியுள்ளார். நவீன் சந்திரா என்ற தெலுங்கு நடிகர் நடித்து கொண்டிருக்கும் தெலுங்கு படத்தில் அவருக்கு ஜோடியாக நடிக்க ஒப்பந்தமாகியுள்ளதாக சஞ்சனா சாரதி தெரிவித்துள்ளார்.

இந்த படத்தின் கேரக்டர் தனக்கு மிகவும் பிடித்த கேரக்டர் என்றும் இது ஒரு ஃபேமிலி என்டர்டெய்னர் படம் என்றும் நான் நவீன் ஜோடியாக நடிக்கிறேன் என்றும் அவர் தெரிவித்துள்ளார். இந்த படத்தின் படப்பிடிப்பு சமீபத்தில் முடிவடைந்தது என்றும், தற்போது போஸ்ட் புரொடக்ஷன் பணிகள் நடைபெற்று வருவதாகவும் தெலுங்கில் நான் அறிமுகமாகும் முதல் படத்தின் ரிலீஸ் தேதியை எதிர்பார்த்து காத்திருப்பதாகவும் அவர் தெரிவித்துள்ளார்.

சஞ்சனா ஏற்கனவே தமிழில் உருவாகி வரும் ’நினைவோ ஒரு பறவை’ என்ற திரைப்படத்தில் நடித்து வருகிறார். அறிமுக இயக்குனர் ரிதுன் என்பவர் இயக்கி வரும் இந்தப் படம் ஒரு காதல் திரைப்படம் என்றும் இந்த படத்தில் நடித்து வரும் வயதான தம்பதிகளின் இளம் பருவ காதலர்களாக தானும், ஹரி பாஸ்கரும் நடித்துள்ளதாகவும் சஞ்சனா தெரிவித்துள்ளார்.

’துப்பாக்கி’ படத்திற்கு பிறகு பல திரைப்படங்களில் தனக்கு வாய்ப்பு கிடைத்ததாகவும் ஆனால் அனைத்துமே தங்கை வேடங்களாக இருந்ததால் நல்ல கேரக்டர் வரும் வரை காத்திருக்க முடிவு செய்ததாகவும் எனது காத்திருப்புக்கு பயன் கிடைத்து வகையில் தற்போது நாயகியாக நடித்துக் கொண்டிருக்கிறேன் என்றும் சஞ்சனா தெரிவித்துள்ளார்.