முதல் முறையாக விஜய் படத்தில் நாயகி மற்றும் பாடல்கள் இல்லாமல் உருவாக இருப்பதாக வெளிவந்த தகவல் அவரது ரசிகர்களுக்கு பெரும் ஆச்சரியத்தை அளித்துள்ளது.

தளபதி விஜய் நடித்து முடித்துள்ள 65வது திரைப்படம் பீஸ்ட். இந்த படம் விரைவில் வெளியாக இருக்கும் நிலையில் அவர் நடிக்க இருக்கும் ’தளபதி 66’ படத்தின் படப்பிடிப்பு அடுத்த மாதம் தொடங்க உள்ளது. இந்த நிலையில் தளபதி விஜய் நடிக்கும் 67வது திரைப்படத்தை லோகேஷ் கனகராஜ் இயக்க இருப்பதாக கிட்டத்தட்ட உறுதி செய்யப்பட்டுள்ளது. இந்த நிலையில் இந்த படம் குறித்த கூடுதல் தகவல்கள் தற்போது வெளிவந்துள்ளன.

லோகேஷ் கனகராஜ் இயக்கவிருக்கும் ’தளபதி 67’ திரைப்படம் முழுக்க முழுக்க ஒரு ஆக்சன் படம் என்றும் இந்த படத்தில் நாயகி மற்றும் பாடல்கள் இரண்டுமே இல்லை என்றும் கூறப்படுகிறது. விஜய் படம் என்றாலே பாடல்களுக்கு முக்கியத்துவம் இருக்கும் என்பதும் அதேபோல் நாயகிகள் இல்லாத விஜய் படம் என்பதை அவரது ரசிகர்கள் நினைத்து கூட பார்த்திருக்க மாட்டார்கள் என்பதும் தெரிந்ததே.

ஆனால் இந்த இரண்டும் இல்லாமல் விஜய் திரைப்படம் ஒன்று வெளியாக இருப்பது பெரும் ஆச்சரியத்தை ரசிகர்களுக்கு ஏற்படுத்தி உள்ளது. லோகேஷ் கனகராஜ் இயக்கிய ’கைதி’ திரைப்படத்திலும் நாயகி மற்றும் பாடல்கள் இல்லை என்பது குறிப்பிடத்தக்கது.