தளபதி விஜய் நடித்த ‘லியோ’ படத்தின் படப்பிடிப்பு முடிவடைந்து தற்போது தொழில்நுட்ப பணிகள் விறுவிறுப்பாக நடைபெற்று வருகிறது என்பதை பார்த்து வருகிறோம். மேலும் இந்த படம் அக்டோபர் 19ஆம் தேதி ஆயுதபூஜை விடுமுறை தினத்தில் வெளியிட படக்குழு திட்டமிட்டுள்ளது என்பதும் இது குறித்த அதிகாரப்பூர்வ அறிவிப்பும் ஏற்கனவே வெளியாகியது என்பது தெரிந்ததே.

இந்த நிலையில் ‘லியோ’ படம் வெளியாகும் தேதியிலிருந்து ஆறு வாரங்களுக்கு முன்பே பிரிட்டனில் முன்பதிவு செய்ய ஏற்பாடு செய்யப்பட்டுள்ளதாக தகவல் வெளியாகியுள்ளது. ஒரு இந்திய திரைப்படம், ஆறு வாரங்களுக்கு முன்பே முன்பதிவு செய்யப்படுவது இதுதான் முதல் முறை என்ற சாதனையை ‘லியோ’ திரைப்படம் செய்யவுள்ளது என்பது குறிப்பிடத்தக்கது.

பிரிட்டனை போலவே வேறு சில நாடுகளிலும் முன்கூட்டியே முன்பதிவு நடைபெறும் என்று எதிர்பார்க்கப்படுகிறது. தமிழகத்தில் இந்த படத்தின் முன்பதிவு அக்டோபர் முதல் வாரம் தொடங்கும் என்று எதிர்பார்க்கப்படுகிறது.

தமிழ் சினிமா வரலாற்றில் ‘லியோ’ திரைப்படம் மிகப்பெரிய எதிர்பார்ப்பை ஏற்படுத்தியுள்ள நிலையில் இந்த படம் வசூலில் மிகப்பெரிய சாதனை செய்யும் என்றும் கூறப்படுகிறது

விஜய், த்ரிஷா, சஞ்சய்தத், பிரியா ஆனந்த், சாண்டி மாஸ்டர், மிஷ்கின், மன்சூர் அலிகான், மேத்யூ தாமஸ், கௌதம் மேனன் மற்றும் ஆக்சன் கிங் அர்ஜுன் ஆகியோர் உள்பட பலர் ’லியோ’ படத்தில் நடித்துள்ளனர். இந்த படத்தை பெரும் பொருட்செலவில் லலித் தயாரித்து வருகிறார். லோகேஷ் கனகராஜ் இயக்கத்தில், அனிருத் இசையில், பிலோமின் ராஜ் படத்தொகுப்பில், சதீஷ்குமார் கலை இயக்கத்தில், அன்பறிவ் ஸ்டண்ட் இயக்கத்தில், தினேஷ் நடன இயக்கத்தில் இந்த படம் உருவாகி வருகிறது.