மருத்துவர்கள், செவிலியர்களுக்கு தங்கமான பரிசு வழங்கிய விஜய் ரசிகர்கள்!
- IndiaGlitz, [Monday,May 31 2021]
தமிழகத்தில் ஒவ்வொரு முறையும் பேரிடர் நிகழும்போது முதல் நபராக பொது மக்களுக்கு உதவி செய்வது விஜய் ரசிகர் தான் என்பதை அவ்வப்போது பார்த்து வருகிறோம். கனமழை ஆகட்டும், புயல் வெள்ளம் ஆகட்டும் எந்த இயற்கை பேரிடர் வந்தாலும் களத்தில் நின்று சமூக பணியாற்றுவதில் விஜய் ரசிகர்கள் முதலிடம் பெறுவார்கள் என்பது குறிப்பிடத்தக்கது.
அந்த வகையில் தற்போது தமிழகம் முழுவதும் கடந்த ஒரு ஆண்டுக்கும் மேலாக பொதுமக்களை வாட்டி வதைத்து வரும் கொரோனா வைரஸால் பாதிக்கப்பட்ட மக்களுக்கு விஜய் ரசிகர்கள் பலர் ஆங்காங்கே தங்களால் முயன்ற உதவிகளை செய்து வருகின்றனர்.
அந்த வகையில் தற்போது மக்களின் உயிரைக் காக்கும் பணியில் ஈடுபட்டுவரும் மருத்துவர்கள், செவிலியர்கள், ஆம்புலன்ஸ் டிரைவர்கள், மற்றும் சிடி ஸ்கேன் லேப் டெக்னீசியன்கள் ஆகியோர்களை பாராட்டி புதுக்கோட்டை தளபதி விஜய் மக்கள் இயக்கத்தினர் தங்க நாணயங்களை வழங்கி உள்ளனர். இது குறித்த புகைப்படங்கள் தற்போது சமூக வலைதளங்களில் வைரலாகி வருகிறது என்பதும், விஜய் ரசிகர்களுக்கு பாராட்டுக்கள் குவிந்து வருகிறது என்பதும் குறிப்பிடத்தக்கது.