విజయ్ దేవరకొండ, సమంత జంటగా ప్రేమ కథల స్పెషలిస్ట్ శివ నిర్వాణ దర్శకత్వంలో తెరకెక్కిన చిత్రం ‘‘ఖుషి’’. గత శుక్రవారం ప్రపంచవ్యాప్తంగా ప్రేక్షకుల ముందుకు వచ్చిన ఈ సినిమాకు అన్ని వర్గాల నుంచి విశేష స్పందన లభిస్తోంది. లవ్ అండ్ ఫ్యామిలీ ఎంటర్‌టైనర్‌గా వచ్చిన ఈ చిత్రానికి ప్రేక్షకులు బ్రహ్మరథం పడుతున్నారు. చార్ట్‌బస్టర్ పాటలు, ట్రైలర్‌తో భారీ హైప్ సంపాదించుకున్న ఖుషికి మంచి స్పందన వచ్చింది. అంతేకాదు.. ఈ సినిమా విజయ్ దేవరకొండకు అతిపెద్ద ఓపెనర్‌గా నిలిచింది. మూడు రోజుల్లో 70.23 కోట్ల గ్రాస్ వసూళ్లు రాబట్టింది. ముఖ్యంగా యూఎస్‌లో ఖుషి బ్రేక్ ఈవెన్ మార్క్ చేరుకుంది. వీకెండ్ ముగిసే నాటికి ఈ సినిమా 1.4 బిలియన్ డాలర్ల గ్రాస్ రాబట్టి 2 మిలియన్ల దిశగా పరుగులు తీస్తోంది. ఖుషి ఓవర్సీస్ హక్కులు రూ.5.5 కోట్లకు అమ్ముడు పోయినట్లుగా సమాచారం. ఈ క్రమంలోనే సోమవారం లాభాల్లోకి ఎంటర్ కానుంది. వీక్ డేస్‌లోనూ ఖుషికి మెరుగైన వసూళ్లు వస్తాయని అంచనా.

సమంత అరుదైన్ ఫీట్:

అటు ఖుషి సినిమాతో సమంత అరుదైన ఘనతను సొంతం చేసుకున్నారు. ఇది ఆమె కెరీర్‌లో 17వ మిలియన్ డాలర్ మూవీ. ఇప్పటి వరకు మరే ఇతర దక్షిణాది హీరోయిన్ కూడా ఈ మార్క్ చేరుకోలేదు. గతంలో తాను నటించిన లేడీ ఓరియెంటెడ్ చిత్రాలతోనూ సామ్ వన్ మిలియన్ డాలర్లు సంపాదించారు. ఇప్పటి వరకు బాగానే వుంది కానీ.. సోమవారం నుంచి ఖుషి బాక్సాఫీస్ వద్ద ఎలాంటి ప్రదర్శన చేయబోతుందో చూడాలి. నైజాం, వైజాగ్, ఇతర ఏరియాల్లో ఖుషికి సాలీడ్ కలెక్షన్లు వచ్చాయి.

యాదాద్రిలో ఖుషి టీమ్ :

కాగా.. ఖుషి సూపర్‌హిట్ కావడంతో చిత్ర యూనిట్ యాదాద్రి లక్ష్మీ నరసింహ స్వామిని దర్శించుకుంది. హీరో విజయ్ దేవరకొండ, ఆయన పేరెంట్స్, తమ్ముడు ఆనంద్ దేవరకొండ, దర్శకుడు శివ నిర్వాణ, నిర్మాతలు నవీన్ యెర్నేని, వై రవిశంకర్ తమ కుటుంబ సభ్యులతో కలిసి స్వామి వారిని దర్శించుకున్నారు. ఈ సందర్భంగా విజయ్ మాట్లాడుతూ.. ఈ ఏడాది తమ కుటుంబానికి చాలా కలిసొచ్చిందన్నారు. తన సోదరుడు నటించిన బేబీ, తాను పనిచేసిన ఖుషి రెండూ సూపర్‌హిట్ అయ్యాయి. అందుకు భగవంతుడికి కృతజ్ఞతలు తెలిపారు. యాదాద్రి ఆలయాన్ని అద్భుతంగా నిర్మించారని.. తాము ఏ ఇబ్బంది లేకుండా దర్శనం చేసుకునేందుకు ఆలయ అధికారులు, పోలీసులు సహకరించారని విజయ్ దేవరకొండ వారికి ధన్యవాదాలు తెలిపారు.