పెళ్లిచూపులు` సినిమాతో ప్రేక్షకులలో గుర్తింపు తెచ్చుకుని, అర్జున్ రెడ్డి` మూవీతో స్టార్ హీరోగా ఎదిగిపోయారు విజయ్ దేవరకొండ. ఈ సినిమా తర్వాత విజయ్ స్టార్ డమ్ అమాంతం పెరిగిపోయింది. ఈయన కాల్షీట్స్ కోసం నిర్మాతలు.. సినిమాల కోసం ప్రేక్షకులు ఎదురుచూస్తున్నారంటే విజయ్ కున్న ప్రాముఖ్యత అర్ధం చేసుకోవచ్చు. ఈ నేప‌థ్యంలోనే ప్ర‌ముఖ నిర్మాణ సంస్థ‌ మైత్రీ మూవీ మేకర్స్.. విజయ్ దేవ‌ర‌కొండ‌తో సినిమా చేయ‌డం కోసం రూ. రెండున్నర కోట్ల చెక్ అడ్వాన్స్‌ ఇచ్చినట్టు తెలుస్తోంది. స‌రికొత్త క‌థ‌తో తెర‌కెక్క‌నున్న ఈ సినిమా ద్వారా ఓ నూతన దర్శకుడు పరిశ్రమకు పరిచయం కానున్నారు.

అలాగే... విజయ్ సరసన కన్నడ నటి రష్మిక మందన్న కథానాయికగా నటించ‌నుంద‌ని స‌మాచారం. ఈ సినిమా ఈ సంవత్సరం జూన్ తర్వాత చిత్రీకరణ జరుపుకోనుంది. విజయ్, రష్మిక ఇప్ప‌టికే పరశురాం దర్శకత్వంలో తెరకెక్కుతున్న మూవీలో నటిస్తున్న సంగ‌తి తెలిసిందే. ఈ సినిమా చిత్రీకరణ చివరి దశలో ఉంది. అంతేగాకుండా...విజ‌య్ దేవ‌ర‌కొండ న‌టిస్తున్న తాజా చిత్రాల‌లో ఒక‌టైన టాక్సీ వాలా` ఇప్ప‌టికే పోస్ట్ ప్రొడ‌క్ష‌న్ ద‌శ‌లో ఉంది. మార్చి నెలలో ఈ సినిమా విడుదల కానున్నట్టు సమాచారం. అలాగే విజయ్ అతిథి పాత్ర‌లో నటిస్తున్న మహానటి` సినిమా కూడా మార్చి 30న విడుదల కానుంది. చూస్తుంటే.. ఈ ఏడాది విజ‌య్ హ‌వా బాగానే ఉండ‌బోతుంద‌న్న‌మాట‌.