தளபதி விஜய் தற்போது வெங்கட் பிரபு இயக்கத்தில் உருவாகி வரும் ’கோட்’ படத்தில் நடித்துக் கொண்டிருக்கும் நிலையில் இந்த படத்தின் அடுத்த கட்ட படப்பிடிப்பு திருவனந்தபுரத்தில் நடைபெற இருப்பதாகவும் இதற்காக நேற்று விஜய் திருவனந்தபுரம் சென்றார் என்பதையும் பார்த்தோம். இந்த நிலையில் திருவனந்தபுரம் சென்ற விஜய்யை பார்க்க ரசிகர்கள் முண்டியடித்த நிலையில் சில சேதங்கள் மற்றும் விபரீதங்கள் நடந்ததாக தகவல் வெளியாகி உள்ளது.

விஜய் நடித்து வரும் போது ’கோட்’ படத்தின் கிளைமாக்ஸ் படப்பிடிப்பு திருவனந்தபுரம் கிரிக்கெட் மைதானத்தில் நடைபெற உள்ள நிலையில் நேற்று விஜய் விமானம் மூலம் திருவனந்தபுரம் சென்றார். அவரை விமான நிலையத்தில் வரவேற்க ஏராளமான ரசிகர்கள் கூடியதை அடுத்து கூடுதல் பாதுகாப்பு ஏற்பாடுகள் செய்யப்பட்டிருந்தது.

இந்த நிலையில் விமான நிலையத்தில் ரசிகர்களின் அன்பு மழையில் நனைந்த விஜய் அதன் பின் காரில் படப்பிடிப்பு நடக்கும் இடத்திற்கு சென்றபோது வழிநெடுக ரசிகர்கள் ’தலைவா தலைவா’ என்று கோஷமிட்டு கொண்டே இருந்தனர் என்பதும் ஒரு சிலர் காரின் பின்னாலே ஓடியதால் பரபரப்பு ஏற்பட்டது என்பது குறிப்பிடத்தக்கது.

ஒரு கட்டத்தில் ரசிகர்கள் விஜய்யின் காரில் சூழ்ந்து கொண்ட நிலையில் திடீரென கார் கண்ணாடி உடைந்ததாகவும் இதனால் காரில் இருந்தவர்கள் அதிர்ச்சி அடைந்ததாகவும் தெரிகிறது. அதன்பின் ஒரு வழியாக விஜய்யை பத்திரமாக படப்பிடிப்பு நடக்கும் இடத்திற்கு கொண்டு போய் சேர்ந்தனர்.

விஜய் மீது தமிழக ரசிகர்களை விட வெறித்தனமாக கேரளா ரசிகர்கள் பாசம் வைத்திருப்பதே இந்த விபரீதம் மற்றும் கார் சேதத்துக்கு காரணம் என்று கூறப்படுகிறது. இருப்பினும் விஜய் இதற்காக எந்தவித வருத்தமும் கொள்ளவில்லை என்றும் ரசிகர்கள் நம் மீது இருக்கும் அன்புக்கு தான் தலை வணங்குவதாகவும் தெரிவிக்கப்பட்டதாக தெரிகிறது. இன்னும் சில நாட்கள் திருவனந்தபுரத்தில் படப்பிடிப்பு நடைபெறும் நிலையில் விஜய் பார்க்க தினமும் கூட்டம் கூடும் என்று எதிர்பார்க்கப்படுகிறது.