தமிழக வெற்றிக் கழகத்தின் கொள்கை பிரகடன முதல் மாநில மாநாட்டிற்கு இடம் வழங்கிய விவசாயிகள் மற்றும் அவர்களுடைய குடும்பத்தினரை நேரில் அழைத்து மரியாதை செய்யும் நிகழ்ச்சி இன்று நடைபெறும் நிலையில் தவெக தலைவர் விஜய் சற்றுமுன் பனையூர் அலுவலகம் வந்தடைந்தார்.

விவசாயிகளின் குடும்பத்தினர் மட்டுமல்லாமல், மாநாட்டு ஏற்பாட்டாளர்கள் மற்றும் மாநாட்டிற்கு பணியாற்றிய நிர்வாகிகளையும் நேரில் அழைத்து விஜய் இன்று மரியாதை செய்கிறார் என தகவல் வெளியாகியுள்ளது.

முன்னதாக கடந்த மாதம் 27ஆம் தேதி விழுப்புரம் மாவட்டம் விக்கிரவாண்டி பகுதியில் தமிழக வெற்றி கழகத்தின் மாநாடு பிரமாண்டமாக நடைபெற்ற நிலையில் இந்த மாநாட்டிற்காக அந்த பகுதியில் உள்ள விவசாயிகள் தங்கள் நிலத்தை அளித்தனர். அதேபோல் பார்க்கிங் உள்பட அனைத்து வசதிகளுக்கும் இடமளித்த விவசாயிகளுக்கும் நில உரிமையாளர்களுக்கும் நன்றி தெரிவிக்கும் விதமாக இன்று மரியாதை செலுத்தும் நிகழ்வு நடைபெறுகிறது என்பது குறிப்பிடத்தக்கது.

தமிழக அரசியல் வரலாற்றில் மாநாட்டுக்கு இடம் கொடுத்த விவசாயிகளை நேரில் அழைத்து ஒரு கட்சியின் தலைவர் நன்றி செலுத்துவது இதுவே முதல்முறை என அரசியல் விமர்சகர்கள் கருத்து தெரிவித்து வருகின்றனர்.