பிரபல தயாரிப்பாளரும் பாலாவின் 'தாரை தப்பட்டை' படத்தில் இருந்து நடிகராகவும் கோலிவுட் திரையுலகில் வலம் வரும் ஆர்.கே.சுரேஷ், வில்லனில் இருந்து ஹீரோவாக பதவி உயர்வு பெற்று மூன்று படங்களில் ஹீரோவாக நடித்து வருகிறார். அவற்றில் ஒரு படம் எஸ்.ஜெய்சங்கர் இயக்கும் 'வேட்டை நாய்'. இவர் ஏற்கனவே அப்புக்குட்டி நடித்த 'மன்னாரு' படத்தை இயக்கியவர்.

இந்த நிலையில் 'வேட்டை நாய்' படத்தின் படப்பிடிப்பு மதுரை பெரியகுளம் அருகே நடைபெற்று வருகிறது. இந்த படப்பிடிப்பில் அடுப்பில் எரியும் பானைகள், பானையில் கொதிக்கும் நீருடன் ஒரு சண்டைக்காட்சி படமாக்கப்பட்டது. நாயகன் ஆர்.கே.சுரேஷ் மற்றும் வில்லன் நடிகர் விஜய் கார்த்திக் ஆகியோர் ஆக்ரோஷமான சண்டைக்காட்சி படமாக்கப்பட்டபோது எதிர்பாராதவிதமாக அடுப்பில் சரிந்து விழுந்த ஆர்.கே.சுரேஷ் மீது வெந்நீர் பானை விழுந்து வெந்நீர் கொட்டித் தீக் காயங்கள் ஏற்பட்டன. உடனடியாகப் படப்பிடிப்பு நிறுத்தப்பட்டு மதுரை மருத்துவமனைக்கு கொண்டு செல்லப்பட்டார். அங்கு அவருக்குச் சிகிச்சை அளிக்கப்பட்டு வருகிறது.

ஆர்.கே.சுரேஷ் ஜோடியாக 'கடுகு' நாயகி சுபிக்சா மற்றும் ராம்கி, வாணி விஸ்வநாத், தம்பி ராமையா, சரவண சக்தி , 'என் உயிர்த் தோழன்' ரமா ஆகியோரும் நடித்து வருகின்றனர். இப்படத்தை தாய் மூவீஸ் தயாரிக்கிறது.