டெல்டா விவசாயிகளின் வங்கிக்கடனை ரத்து செய்ய வேண்டும்: பிரபல இயக்குனர் கோரிக்கை
- IndiaGlitz, [Saturday,November 24 2018]
சமீபத்தில் கஜா புயல் டெல்டா மாவட்ட மக்களின் ஒட்டுமொத்த வாழ்வாதாரத்தை அழித்துவிட்டு சென்ற நிலையில் நிவாரண பணிகள் ஒருபக்கம் நடைபெற்று வந்தாலும் இன்னும் ஒருசில உள்புற கிராம பகுதிகளுக்கு போதுமான நிவாரணம் சென்று சேரவில்லை என்று கூறப்படுகிறது.
டெல்டா பகுதி மக்கள் தங்களது வாழ்நாள் சேமிப்பு முழுவதையும் இழந்து தவித்து வரும் நிலையில் அவ்ர்கள் பெற்ற வங்கி கடனை தமிழக அரசு ரத்து செய்ய வேண்டும் என்று பிரபல இயக்குனர் வெற்றிமாறன் அரசுக்கு கோரிக்கை வைத்துள்ளார்.
கஜா புயலின் கோரத்தாண்டவத்தால் உணவு, உடை, இருப்பிடம் போன்ற அத்தியாவசிய தேவைக்கு வழியில்லாமல் இருக்கும் டெல்டா விவசாயிகள், வங்கிக்கடனை திரும்ப கட்டுவது என்பது சாத்தியமற்றது என்றும் சமூக ஆர்வலர்கள் வலியுறுத்தி வருகின்றனர். தமிழக அரசு இந்த கோரிக்கையை பரிசீலித்தால் டெல்டா விவசாயிகள் ஓரளவு நிம்மதி அடைவார்கள் என்பது குறிப்பிடத்தக்கது