தனுஷ்-வெற்றிமாறன் கூட்டணியில் வெளியான 'பொல்லாதவன்' மற்றும் 'ஆடுகளம்' ஆகிய இரண்டு படங்களுமே வசூல் அளவில் நல்ல வெற்றியை பெற்று தந்ததோடு, ஆடுகளம் படத்தின் மூலம் தனுஷூக்கு தேசிய விருது என்ற அந்தஸ்தும் கிடைத்தது.

இதனை அடுத்து இந்த கூட்டணி மீண்டும் 'வடசென்னை' படத்தின் மூலம் இணையவுள்ளதாகவும், மிக விரைவில் இந்த படத்தின் படப்பிடிப்பு தொடங்கவுள்ளதாகவும் கடந்த சில மாதங்களாக செய்திகள் வெளிவந்து கொண்டிருக்கின்றது.

இந்நிலையில் சற்று முன்னர் வெளியான புதிய தகவலின்படி இந்த படத்தின் படப்பிடிப்பு வரும் ஜூன் மாதம் 15ஆம் தேதி முதல் தொடங்கவுள்ளதாக கூறப்படுகிறது.

தங்கமகன்' படத்திற்கு பின்னர் மீண்டும் தனுஷ்-சமந்தா இணையவுள்ள இந்த படத்தை தனுஷின் வொண்டர்பார் பிலிம்ஸ் நிறுவனம் தயாரிக்கவுள்ளது. மற்ற டெக்னிஷியன்கள் மற்றும் நடிகர், நடிகைகளின் தேர்வுகள் நடைபெற்று வருவதாக கூறப்படுகிறது.

இந்நிலையில் ஏற்கனவே தனுஷ், பிரபுசாலமன் இயக்கத்தில் 'தொடரி' என்ற படத்திலும், துரைசெந்தில்குமார் இயக்கத்தில் 'கொடி' படத்திலும் நடித்து முடித்துவிட்டார். இந்த இரண்டு படங்களின் ரிலீஸ் தேதி விரைவில் அறிவிக்கப்படவுள்ளது. தனுஷ் தற்போது கவுதம் மேனன் இயக்கத்தில் 'எனை நோக்கி பாயும் தோட்டா' என்ற படத்தில் நடித்து வருகிறார். மேலும் அவர் கார்த்திக் சுப்புராஜ் இயக்கத்திலும் மிக விரைவில் ஒரு படத்தில் நடிக்கவுள்ளார் என்பது குறிப்பிடத்தக்கது.