நடிகை ஸ்ரீதேவி துபாயில் குடும்ப நண்பர் ஒருவரின் திருமணத்திற்கு கலந்து கொள்ள சென்றிருந்த நிலையில் திடீரென மாரடைப்பு ஏற்பட்டு காலமானார். அவருக்கு வயது 54

குழந்தை நட்சத்திரமாக அறிமுகமாக அதன் பின்னர் தமிழ், தெலுங்கு, இந்தி உள்பட பல மொழி திரைப்படங்களில் நடித்தவர் ஸ்ரீதேவி. பாலிவுட்டில் சுமார் பத்து ஆண்டுகாலம் நம்பர் ஒன் இடத்தில் இருந்த ஒரே தமிழ் நடிகை ஸ்ரீதேவிதான்

இந்த நிலையில் கணவர் மற்றும் மகளுடன் குடும்ப நண்பர் ஒருவரின் திருமண நிகழ்ச்சியில் கலந்து கொள்ள ஸ்ரீதேவி துபாய் சென்றிருந்தார். இந்த நிலையில் நேற்றிரவு திடீரென அவருக்கு மாரடைப்பு ஏற்பட்டு உயிரிழந்தார். ஸ்ரீதேவியின் உயிர் பிரிந்தபோது அவரது கணவர் போனி கபூர் மற்றும் மகள் குஷி கபூர் ஆகியோர் உடனிருந்தனர்.

ரஜினி, கமல், அமிதாப் உள்பட இந்தியாவின் உச்ச நட்சத்திரங்கள் பலருடன் நடித்த ஸ்ரீதேவி கடைசியாக 'மாம்' என்ற படத்தில் தோன்றினார். பத்மஸ்ரீ, பிலிம்பேர் விருதுகளை பெற்ற ஸ்ரீதேவியின் மறைவு திரையுலகிற்கும், ரசிகர்களுக்கும் மாபெரும் இழப்பு என்பது குறிப்பிடத்தக்கது