பழம்பெரும் தென்னிந்திய நடிகையும், நடிகை செளகார் ஜானகியின் சகோதரியுமான கிருஷ்ணகுமாரி இன்று பெங்களூரில் உள்ள அவரது இல்லத்தில் காலமானார். அவருக்கு வயது 85. அவர் கடந்த சில வருடங்களாக புற்றுநோயால் அவதியுற்று சிகிச்சை பெற்று வந்ததாகவும், சிகிச்சையின் பலனின்றி இன்று காலை அவர் மரணம் அடைந்துவிட்டதாகவும் அவரது குடும்பத்தினர் தெரிவித்துள்ளனர்.

தமிழ், தெலுங்கு, கன்னடம் என தென்னிந்திய மொழிகளில் சுமார் 225 படங்களில் நடித்துள்ள நடிகை கிருஷ்ணகுமாரி, சிவாஜிகணேசனுடன் 'திரும்பிப்பார்', துளிவிஷம் போன்ற படங்களில் நடித்துள்ளார். மேலும் என்.டி.ராமராவ், நாகேஷ்வரராவ், ராஜ்குமார், ஜக்கையா போன்ற தென்னிந்திய பிரபலங்களின் படங்களில் நடித்துள்ளார்.

இவர் நடித்த ஆஷா சுந்தரி, தசவதாரா, பக்த கபீரா, ஸ்வர்ண கெளரி, சந்திரகுமாரா, சதி சாவித்ரி போன்ற படங்கள் 1960களில் சூப்பர் ஹிட் ஆனவை என்பது குறிப்பிடத்தக்கது.

மறைந்த கிருஷ்ணகுமாரின் உடல் நாளை தகனம் செய்யப்படும் என அவரது குடுபத்தினர் தெரிவித்துள்ளனர். அன்னாரது ஆத்மா சாந்தியடைய இறைவனை பிரார்த்தனை செய்வோம்.