గుడ్‌బై చెబుతున్నందుకు చాలా బాధగా ఉంది: నాగ్
- IndiaGlitz, [Friday,November 06 2020]
నాగార్జున టైటిల్‌ రోల్‌లో నటిస్తున్న చిత్రం ‘వైల్డ్‌డాగ్‌’. ఏసీపీ విజయ్‌ వర్మగా ఈ చిత్రంలో నాగ్ నటిస్తున్నారు. రెండు వారాలుగా ఈ చిత్రం హిమాలయాస్‌లో చిత్రీకరణ జరుపుకుంటున్న విషయం తెలిసిందే. తాజాగా సినిమాలో నాగార్జున పార్ట్‌ చిత్రీకరణ పూర్తయ్యింది. దీంతో ఆయన తిరిగి హైదరాబాద్‌కు ప్రయాణమయ్యారు. ఈ విషయాన్ని నాగార్జున ట్విట్టర్‌ వేదికగా తెలియజేశారు.
తన టీంతో పాటు హిమాలయాలకు కూడా గుడ్‌బై చెబుతున్నందుకు చాలా బాధగా ఉందని నాగ్ ట్వీట్‌లో వెల్లడించారు. ‘వైల్డ్‌డాగ్‌లో నా పాత్ర చిత్రీకరణ ఈరోజుతో పూర్తయ్యింది. ఇంటికి బయలుదేరాను. నా టాలెంటెడ్‌ టీమ్‌కు, హిమాలయాస్‌కు గుడ్‌బై చెబుతున్నందుకు చాలా బాధగా ఉంది’ అని నాగ్ ట్వీట్‌లో పేర్కొన్నారు. ట్వీట్‌తో పాటు కొన్ని ఫొటోలను సైతం నాగార్జున షేర్‌ చేశారు.
ఈ సినిమా ఫ‌స్ట్ లుక్ అంద‌రిలోనూ ఆస‌క్తిని రేకెత్తించింది. నిజ జీవిత ఘ‌ట‌న‌ల‌ను ఆధారంగా చేసుకుని ఈ చిత్రాన్ని రూపొందిస్తున్నట్టు చిత్రబృందం తెలిపింది. ‘వైల్డ్ డాగ్’లో నాగ్‌కు జోడీ దియామీర్జా నటిస్తున్నారు. కీలక పాత్రలో సయామీ ఖేర్‌ నటిస్తున్నారు. నూతన దర్శకుడు అహిషోర్‌ సాల్మన్‌ దర్శకత్వంలో మ్యాట్నీ ఎంటర్‌టైన్‌మెంట్‌ బ్యానర్‌పై నిరంజన్‌రెడ్డి, అన్వేష్‌రెడ్డి సంయుక్తంగా ఈ చిత్రాన్ని నిర్మిస్తున్నారు.