'తొలి ప్రేమ' చిత్రంతో ద‌ర్శ‌కుడిగా ప‌రిచ‌య‌మైన వెంకీ అట్లూరి.. మొద‌టి సినిమాతోనే మంచి విజ‌యాన్ని అందుకున్నారు. ప్ర‌స్తుతం యువ క‌థానాయ‌కుడు అఖిల్‌తో త‌న రెండో చిత్రాన్ని తెర‌కెక్కించే ప‌నిలో బిజీగా ఉన్నారు వెంకీ. ఇటీవ‌లే ఈ సినిమా సెట్స్ పైకి వెళ్ళింది.

ఇంత‌లోపే.. మ‌రో ప్రాజెక్ట్ ఓకే అయింద‌ని ఫిల్మ్‌న‌గ‌ర్ వ‌ర్గాలు ముచ్చ‌టించుకుంటున్నాయి. తాజా స‌మాచారం ప్ర‌కారం.. ఈ సినిమాలో సీనియ‌ర్ క‌థానాయ‌కుడు విక్ట‌రీ వెంక‌టేష్ హీరోగా న‌టించ‌బోతున్నార‌ని తెలుస్తోంది. సురేష్ బాబుతో పాటు మ‌రో నిర్మాత కూడా ఈ సినిమాని నిర్మించ‌బోతున్నార‌ని స‌మాచారం.

త్వ‌ర‌లోనే ఈ ప్రాజెక్ట్‌కు సంబంధించిన పూర్తి వివ‌రాలు వెల్ల‌డి కానున్నాయి. ప్ర‌స్తుతం వెంక‌టేష్‌.. వ‌రుణ్ తేజ్‌తో `ఎఫ్ 2`, నాగ‌చైత‌న్య‌తో `వెంకీ మామ` (ప్ర‌చారంలో ఉన్న పేరు) చేస్తున్నారు. ఆ సినిమాలు పూర్త‌య్యాకే ఈ చిత్రం ప‌ట్టాలెక్కే అవ‌కాశ‌ముంది.