మళ్ళీ వార్తల్లోకి వెంకీ, పూరీ కాంబినేషన్
- IndiaGlitz, [Wednesday,January 24 2018]
సీనియ‌ర్ క‌థానాయ‌కుడు విక్టరీ వెంకటేష్‌ని డాషింగ్ డైరెక్టర్ పూరి జగన్నాథ్ డైరెక్ట్ చేయబోతున్నారా? అవుననే అంటున్నాయి టాలీవుడ్ ఫిలిం వర్గాలు. కాస్త వివ‌రాల్లోకి వెళితే.. గత ఏడాదే ఈ ఇద్దరి కాంబినేష‌న్‌లో ఓ సినిమా తెరకెక్కబోతోందని వార్తలు వినిపించిన సంగ‌తి తెలిసిందే. అయితే.. కొన్ని కారణాల వలన ఆ ప్రాజెక్టుకి కొంత ఆల‌స్యం జ‌రిగింది. ఆ త‌రువాత అనూహ్యంగా వెంకటేష్‌.. తేజతో సినిమా చేయడానికి సిద్ధపడి పోయారు.
అలాగే పూరి జగన్నాథ్ కూడా తన కొడుకు ఆకాష్‌ని హీరోగా పరిచయం చేస్తూ మెహబూబా' సినిమాతో బిజీ అయిపోవడంతో.. ఇక ఈ ఇద్దరి కలయికలో మూవీ దాదాపుగా లేదనే నిర్ణయానికి ఇండస్ట్రీ వర్గాలు కూడా వచ్చేసాయి. ఇదిలా ఉంటే...ప్రస్తుతం తేజ, బాలకృష్ణ ప్రధాన పాత్ర‌ధారిగా ఎన్టీఆర్ బయోపిక్ సినిమాని తెరకెక్కించే పనిలో పడ్డారు. ఈ చిత్రం తర్వాతే వెంకీతో సినిమా చేయనున్నారని సమాచారం. ఇక పూరి మెహబూబా' సినిమా కూడా క్లైమాక్స్ కి చేరుకుంది. ఈ నేప‌థ్యంలో ఇప్పుడు మళ్ళీ వెంకీ, పూరి ద్వయం చేయికలుపుతున్నారని ఇన్‌సైడ్‌ సోర్స్ టాక్. త్వ‌రలోనే ఈ సినిమాపై క్లారిటీ వ‌స్తుంది.