విక్టరీ వెంకటేష్ క‌థానాయ‌కుడిగా న‌టించిన‌ గురు` సినిమా విడుదలై దాదాపు ఏడాది కావస్తోంది. ఈ చిత్రం తర్వాత వెంకీ క‌థానాయ‌కుడిగా తేజ ద‌ర్శ‌క‌త్వంలో.. ఆటా నాదే వేటా నాదే` సినిమా ఈ పాటికే చిత్రీక‌ర‌ణ ద‌శ‌లో ఉండాల్సింది. గత నెలలో పూజా కార్యక్రమాలు కూడా పూర్తి చేసుకున్న‌ప్ప‌టికీ.. రెగ్యుల‌ర్ షూటింగ్ మాత్రం ఇంకా మొదలు కాలేదు. దీనికి కారణం.. బాలకృష్ణ, తేజ కలయికలో ఎన్టీఆర్ జీవిత చరిత్ర ఆధారంగా రూపుదిద్దుకోబోతున్న య‌న్‌.టి.ఆర్` మూవీ. ఎన్టీఆర్ వర్ధంతిని పురస్కరించుకుని ఈ సినిమా స్పెషల్ టీజర్‌ని విడుదల చేయడానికి నిర్ణయించారు బాలకృష్ణ.

ఈ టీజర్ చిత్రీకరణ వలన వెంకీ సినిమా విషయంలో కొంత జాప్యం జరిగింది. ఇప్పుడు య‌న్‌.టి.ఆర్` సినిమా పూర్తి చేయమని బాలయ్య నుంచి ఒత్తిడి పెరగడంతో ఎవరిని ఒప్పించాలో...ఎవరి సినిమా ముందుగా ప్రారంభించాలో తెలియని అయోమయ స్థితిలో పడిపోయారు తేజ. అయితే ఈ విషయమై తేజకి ఊరటనిచ్చే సమాధానం.. వెంకీ నుంచి వచ్చిందని సమాచారం. ముందుగా య‌న్‌.టి.ఆర్` సినిమా పూర్తి చేసుకోమని వెంకీ చెప్పారట. తర్వాత తన సినిమా చేద్దామని చెప్పడంతో...తేజ ప్రస్తుతం య‌న్‌.టి.ఆర్` సినిమాని ప్రారంభించే పనిలో పడ్డారని ఇండస్ట్రీ వర్గాలు చెబుతున్నాయి. ఇదిలా ఉంటే...ఈ గ్యాప్‌లో పూరీ జ‌గ‌న్నాథ్ ద‌ర్శ‌క‌త్వంలో వెంకటేష్ ఓ సినిమా చేయ‌నున్నాడ‌ని తెలుస్తోంది. ప్ర‌స్తుతం పూరీ త‌న త‌న‌యుడు ఆకాష్‌తో 'మెహ‌బూబా' చేస్తున్న విష‌యం తెలిసిందే.