విక్టరీ వెంకటేష్, సంచలన దర్శకుడు తేజ కలయికలో ఓ సినిమా తెరకెక్కుతున్న విషయం తెలిసిందే. దీనికి 'ఆటా నాదే వేటా నాదే' అనే టైటిల్ ప్ర‌చారంలో ఉంది. ఈ వారంలోనే ఈ చిత్రం రెగ్యుల‌ర్ షూటింగ్ ప్రారంభించుకోనుంది. వినిపిస్తున్న క‌థ‌నాల ప్ర‌కారం.. నేటి విద్యావ్యవస్థను టార్గెట్ చేస్తూ ఈ సినిమాని తెరకెక్కించనున్నారని తెలిసింది.

ఇందులో వెంకీ ఫిజిక్స్ ప్రొఫెసర్‌గా సందడి చేయనున్నార‌ని స‌మాచారం. గృహిణి పాత్రలో శ్రియ న‌టిస్తుండ‌గా.. నారా రోహిత్, ఈషా రెబ్బా కీలక పాత్రలు పోషించనున్నారు.

ఇదిలా ఉంటే.. ఇటీవల మలయాళ చిత్రం 'ది గ్రేట్ ఫాదర్'ను చూసారట వెంకటేష్. గత ఏడాది విడుద‌లై ఘనవిజయం సాధించిన ఈ మిస్టరీ థ్రిల్లర్లో మమ్మూట్టి ప్రధాన పాత్రలో నటించ‌గా.. హనీఫ్ అదేని ద‌ర్శ‌క‌త్వం వ‌హించారు. ఈ సినిమా వెంకీని బాగా ఆకట్టుకోవడంతో.. తెలుగులో రీమేక్ చేసే ఆలోచనలో ఉన్నట్టు టాలీవుడ్ ఫిలిం వర్గాలు చెబుతున్నాయి.

దీని పై అధికారిక ప్ర‌క‌ట‌న రావాల్సి ఉంది. 'సామి స్క్వేర్' సినిమాతో బిజీగా ఉన్న విక్రమ్ కూడా వెంకటేష్ లాగే ఈ సినిమాను (తమిళంలోకి) రీమేక్ చేయడానికి ఆసక్తి కనబరుస్తున్నారని తెలుస్తోంది. మొత్తానికి 'ది గ్రేట్ ఫాదర్' చిత్రం ముగ్గురు ఫాదర్లను (తండ్రులను) కదిలించిందన్న మాట.