சிவகார்த்திகேயனின் அடுத்த படத்தை இயக்குவது வெங்கட்பிரபுவா?
- IndiaGlitz, [Wednesday,January 05 2022]
பிரபல நடிகர் சிவகார்த்திகேயன் நடிக்கும் அடுத்த படத்தை இயக்குவது வெங்கட்பிரபு என்ற தகவல் திரையுலகில் பெரும் ஆச்சரியத்தை ஏற்படுத்தி உள்ளது.
சமீபத்தில் வெளியான மாநாடு திரைப்படம் மூலம் மிகப்பெரிய அளவில் புகழ்பெற்ற வெங்கட்பிரபுவுக்கு ரஜினி படம் உள்பட பல முன்னணி நடிகர்களின் படங்களை இயக்குவதற்கான வாய்ப்புகள் வந்து கொண்டிருப்பதாக தகவல்கள் வெளியாகி உள்ளன.
இந்த நிலையில் தமிழ் தெலுங்கு ஆகிய இரண்டு மொழிகளில் சிவகார்த்திகேயன் நடிக்கும் திரைப்படம் ஒன்றின் அறிவிப்பு சமீபத்தில் வெளியானது என்பதும் இந்த படத்தை அனுதீப் என்ற தெலுங்கு இயக்குனர் இயக்க உள்ளார் என்பதும் தெரிந்ததே. இந்த படத்தின் நாயகியாக ராஷ்மிகா மந்தனா நடிக்கவுள்ளார்.
இந்த நிலையில் இந்த படத்தின் தமிழ் பதிப்பில் இயக்குனர் அனுதீப்புக்கு உதவி செய்ய வெங்கட் பிரபு ஒப்பு கொண்டிருப்பதாகவும், வெங்கட்பிரபுவின் கைவண்ணத்தால் தெலுங்கு பாணி தவிர்க்கப்பட்டு, இது ஒரு முழுமையான தமிழ் திரைப்படமாக இருக்கும் என்றும், தகவல்கள் வெளியாகியுள்ளன.
மேலும் வெங்கட்பிரபுவின் சகோதரரும் நடிகருமான பிரேம்ஜி இந்த படத்தில் முக்கிய வேடத்தில் நடிக்க இருப்பதாகவும் பிரவீன் இந்த படத்திற்கு எடிட்டிங் செய்ய உள்ளதாகவும் கூறப்படுகிறது. வெங்கட்பிரபு இந்த படத்தில் பணியாற்றுவது குறித்து அதிகாரப்பூர்வ அறிவிப்பு விரைவில் வெளியாகும் என்று எதிர்பார்க்கப்படுகிறது. இந்த படத்தின் படப்பிடிப்பு இம்மாத இறுதியில் தொடங்க உள்ளதாக கூறப்படுகிறது.