கோலிவுட் திரையுலகில் சூப்பர் ஹிட் ஆன பழைய படங்கள் இரண்டாம் பாகமாக உருவெடுக்கும் டிரெண்ட் கடந்த சில வருடங்களாக உள்ளது. தற்போது ரஜினிகாந்த், கமல்ஹாசன் படங்கள் உள்பட பல திரைப்படங்கள் இரண்டாம் பாகமாக உருவாகி வரும் நிலையில் மேலும் ஒரு இரண்டாம் பாக படம் குறித்த அறிவிப்பு வெளியாகியுள்ளது

கடந்த 1997ஆம் ஆண்டு இயக்குனர் வேலுபிரபாகரன் நடித்து இயக்கிய திரைப்படம் 'கடவுள்'. இந்த படம் பெரும் சர்ச்சைகளை ஏற்படுத்தினாலும் வசூல் அளவில் ஓரளவு வெற்றி பெற்ற படம். இந்த நிலையில் 20 ஆண்டுகளுக்கு பின் இந்த படத்தின் இரண்டாம் பாகத்தை 'கடவுள் 2' என்ற பெயரில் இயக்க வேலுபிரபாகரன் திட்டமிட்டுள்ளார்.

மேலும் இன்று அவர் 'கடவுள் 2' படத்தின் போஸ்டர் ஒன்றையும் வெளியிட்டுள்ளார். 'ஆணைகளிட்டே யார் தடுத்தாலும் அலைகடல் ஓய்வதில்லை' என்ற வரிகளுடன் இந்த போஸ்டர் வெளியாகியுள்ளது. இசைஞானி இளையராஜா இசையில் உருவாகும் இந்த படத்தை சிட்டிபாபு என்பவர் தயாரிக்கின்றார். 

60 வயதான வேலுபிரபாகரன் சமீபத்தில் 35 வயது ஷெர்லி என்ற நடிகையை திருமணம் செய்து கொண்டது சர்ச்சையை ஏற்படுத்திய நிலையில் அவருடைய படமும் சர்ச்சையை ஏற்படுத்துமா? என்பதை பொறுத்திருந்து பார்ப்போம்