பிரபல நடிகர் விக்ரம் நடித்து வரும் 'வீர தீர சூரன்’ படத்தின் படப்பிடிப்பு ஒருபக்கம் விறுவிறுப்பாக நடைபெற்று வரும் நிலையில், இந்த படம் டிசம்பர் மாதம் கிறிஸ்துமஸ் விருந்தாக வெளியாக அதிக வாய்ப்பு இருப்பதாக கூறப்படுவது பரபரப்பை ஏற்படுத்தி உள்ளது.

விக்ரம் நடிப்பில், அருண்குமார் இயக்கத்தில் உருவாகி வரும் 'வீர தீர சூரன்’ படத்தின் படப்பிடிப்பு விறுவிறுப்பாக நடைபெற்று வருகிறது. இந்த படத்தின் நாயகியாக துஷாரா விஜயன் நடித்துவரும் நிலையில், வில்லனாக எஸ். ஜே. சூர்யா நடித்து வருகிறார் என்பதும், மலையாள நடிகர் சித்திக் ஒரு முக்கிய கேரக்டரில் நடித்துள்ளார் என்பதும் குறிப்பிடத்தக்கது. இரண்டு பாகங்களாக உருவாகும் இந்த படம் முதலில் இரண்டாம் பாகம் வெளியாகும் என்றும் அதன் பின்னர் முதல் பாகம் வெளியாகும் என்றும் கூறப்பட்டுள்ளது.

இந்த நிலையில், 'வீர தீர சூரன்’ படப்பிடிப்பு இறுதிக்கட்டத்தை நெருங்கி உள்ள நிலையில், வரும் டிசம்பர் மாதம் கிறிஸ்துமஸ் விருந்தாக இந்த படத்தை வெளியிட படக்குழுவினர் திட்டமிட்டிருப்பதாகவும், விரைவில் இது குறித்த அதிகாரப்பூர்வ அறிவிப்பு வெளியாகும் என்றும் கூறப்படுகிறது.

ஏற்கனவே கிறிஸ்துமஸ் விருந்தாக வெற்றிமாறன் இயக்கத்தில் உருவாகியுள்ள ’விடுதலை 2’ மற்றும் ஷங்கர் இயக்கத்தில் உள்ள ’கேம் சேஞ்சர்’ ஆகிய படங்கள் வெளியாக இருப்பதால், இந்த இரண்டு பெரிய படங்களுடன் 'வீர தீர சூரன்’ மோதுமா? என்பதைக் காத்திருந்து தான் பார்க்க வேண்டும்.