டென்மார்க்-பிரான்ஸ் நாடுகளில் வேதாளம் செய்த சாதனை
- IndiaGlitz, [Monday,November 09 2015]
அஜீத் நடித்த 'வேதாளம்' திரைப்படம் அமெரிக்கா, இங்கிலாந்து, ஆஸ்திரேலியா, உள்பட பல நாடுகளில் பெருவாரியான திரையரங்குகளில் வெளியாகவுள்ளது என்ற செய்தியை ஏற்கனவே பார்த்தோம். மேலும் போலந்து நாட்டில் திரையிடப்படும் முதல் தமிழ்ப்படம் 'வேதாளம்' படம்தான் என்பதையும் பார்த்தோம்.
இந்நிலையில் டென்மார்க் நாட்டில் 'வேதாளம்' திரைப்படம் திரையிடப்படும் தியேட்டர்களின் எண்ணிக்கை குறித்த தகவல்கள் வெளிவந்துள்ளது. டென்மார்க் நாட்டில் இந்த படம் 21 திரையரங்குகளில் திரையிடப்படுவதாகவும், தமிழ்ப்படம் ஒன்று இவ்வளவு அதிகமான திரையரங்குகளில் திரையிடப்படுவது இதுவே முதல்முறை என்றும் கூறப்படுகிறது. இந்த நாட்டில் விஜய்யின் புலி' 20 திரையரங்குகளில் திரையிடப்பட்டது என்பது குறிப்பிடத்தக்கது.
இதேபோல் 'வேதாளம்' பிரான்ஸ் நாட்டிலும் முதல் நாளில் 85 காட்சிகள் திரையிடப்படவுள்ளதாகவும் கூறப்படுகிறது. உலகம் முழுவதும் பெருவாரியான திரையரங்குகளில் ரிலீஸாகி சாதனை செய்து வரும் 'வேதாளம்' வசூலிலும் சாதனை செய்யுமா? என்பதை பொறுத்திருந்து பார்ப்போம்.