മുഖ്യമന്ത്രിയെ സംവാദത്തിന് വെല്ലുവിളിച്ച് പ്രതിപക്ഷ നേതാവ് വി ഡി സതീശൻ. സംവാദത്തിന് വന്നില്ലെങ്കിലും വേണ്ട ധൈര്യമുണ്ടെങ്കിൽ മുഖ്യമന്ത്രി ഒരു പത്ര സമ്മേളനമെങ്കിലും നടത്തട്ടെയെന്നും സതീശൻ പറഞ്ഞു. മാസപ്പടി ഉൾപ്പെടെ 6 അഴിമതികൾ പുതുപ്പള്ളിയിൽ ചർച്ചയാക്കുമ്പോൾ വാദപ്രതിവാദത്തിന് മുഖ്യമന്ത്രിക്ക് ധൈര്യമുണ്ടോ എന്നും സതീശൻ ചോദിച്ചു.

സമീപ കാലത്ത് കേരളം കണ്ട കൊടിയ അഴിമതികളായ എഐ കാമറ, കെഫോൺ ഇടപാടുകളുടെ കേന്ദ്രബിന്ദുവും മുഖ്യമന്ത്രിയുടെ ഓഫിസാണ്. കോവിഡ് കാലത്ത് മെഡിക്കൽ സർവീസസ് കോർപറേഷനെ കൊണ്ട് 1032 കോടി രൂപയുടെ പർച്ചേസ് നടത്തിയതിലും വ്യാപക ക്രമക്കേട് നടന്നു. മന്ത്രി മുഹമ്മദ് റിയാസും മാസപ്പടി വിവാദത്തിൽ ഉത്തരം പറയാൻ ഉത്തരവാദിത്തമുള്ള ആളാണ്. മാസപ്പടി വിവാദത്തില്‍ എം വി ഗോവിന്ദനല്ല, മുഖ്യമന്ത്രി മറുപടി പറയണമെന്ന് ആവശ്യപ്പെട്ടിട്ടും മുഖ്യമന്ത്രിയും റിയാസും ഒന്നും പറയില്ല. പാർട്ടി പറയുമെന്നാണ് പറയുന്നത്. ഇക്കാര്യത്തിൽ എം വി ഗോവിന്ദന് എന്താണ് കാര്യം എന്നും പ്രതിപക്ഷ നേതാവ് ചോദിച്ചു.